दाहालको सुरक्षाका लागि डीएसपीको कमाण्डमा १० प्रहरी थपिए

काठमाडौं। विशिष्ट व्यक्तिको सुरक्षा व्यवस्थापन कार्यविधि उल्लंघन गर्दौ गृह मन्त्रालयले नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहालको सुरक्षामा प्रहरी खटाउन निर्देशन दिएको छ ।

कार्यविधिले प्रधानमन्त्रीलाई मात्रै डीएसपीको नेतृत्वमा सुरक्षा दिने व्यवस्था गरेको छ । तर सुरक्षा चुनौती थपिएको भन्दै गृहमन्त्री बालकृष्ण खाँडको निर्देशनमा सचिवस्तरीय निर्णय गरेर दाहालको सुरक्षामा नेपाल प्रहरीका प्रहरी नायब उपरीक्षक (डिएसपी)को नेतृत्वमा १० जना सुरक्षाकर्मी थपिएको हो ।

गृह मन्त्रालयले केही महिनाअघिे विशिष्ट व्यक्तिको सुरक्षा मापदण्ड २०७७ जारी गरेको थियो । उक्त मापदण्डमा पूर्वप्रधानमन्त्रीलाई सशस्त्रबाट १६ र नेपाल प्रहरीबाट दुई जनामात्र सुरक्षाकर्मी दिइने उल्लेख छ । ओली नेतृत्वको सरकारले पूर्वाग्रह राखेर सुरक्षाकर्मी घटाएको भन्दै माओवादी अध्यक्ष दाहालले असन्तुष्टि जनाउनु भएको थियो ।

उहाँको सुरक्षामा पूर्व जनमुक्ति सेना पनि खट्दै आएको थियो । यसैबीच, नेकपा एमालेका नेता माधवकुमार नेपालको सुरक्षा पनि बढाइएको छ । ओली समूहका कार्यकर्ताबाट थ्रेट बढेको भन्दै सुरक्षाकर्मी थप गरिएको हो ।