चालक हत्याको आरोपमा पूर्वलडाकु पक्राउ

रामेछाप । सुमो भित्र आगो लगाएर चालकको हत्या गरेको अभियोगमा रामेछापबाट माओवादीका एक पूर्व लडाकूसहित २ जना पक्राउ परेका छन् ।

रामेछाप जिल्लाको मझुवा गाविसको निगाल पानीमा झापा नखनपुर घर भएका सूमो चालक विशाल खड्कालाई सूमोभित्रै गोली हानी आगो लगाएर हत्या गरेको अभियोगमा पूर्व अयोग्य लडाकू मनकुमार लिम्बु पक्राउ परेका हुन् ।

तेह्रथुम जिल्ला पौठाक गाविस–४ का लिम्बुसँगै रसुवा जिल्ला सरनथली गाविस–३ की विन्दु तामाङ पनि पक्राउ परेकी छन् ।

उनीहरुलाई झापाको दमकबाट माघ २ गते पक्राउ गरिएको जिल्ला प्रहरी कार्यालय रामेछापले जनाएको छ ।

जिल्ला प्रहरी कार्यालय रामेछापका प्रमुख प्रहरी नायव उपरीक्षक कुमोध  ढुङ्गेल नेतृत्वको टोलीले घटना भएको दुई महिनापछि उनीहरुलाई पक्राउपछि मंगलबार सार्वजनिक गरेको हो । मुख्य अभियुक्त भने अझै फरार रहेको प्रहरीले बताएको छ ।

गत मंसिर ९ गते लु १ ज २१८७ नम्बरको बोलेरो जीपका चालक खड्काको रामेछापको मझुवा–१ निगालपानीमा सूमोभित्रै आगो लगाएर हत्या गरिएको थियो ।