प्रकाशित मिति : शुक्रबार, माघ १४, २०७३
पाल्पा । पाल्पा जिल्लाको भुवनपोखरी गाविस–२ निवासी जगबहादुर दर्लामीले भुवनपोखरी स्वास्थ्य चौकी खोप क्लिनिकलाई जग्गा दान गरेका छन् ।
भुवनपोखरी गाविस–२ मा रहेको १५२० कित्ता नम्बरको एक रोपनी जग्गा स्वास्थ्य चौकीको नाममा विहिबार नामसारी भएको मालपोत कार्यालयका प्रमुख नवराज बरालले बताए ।
स्वास्थ्य चौकी राख्नका लागि उपयुक्त जग्गा किन्न पनि नपाएपछि आफूले दिएको दर्लामीले बताए । “मानव जीवनको सबैभन्दा संवेदनशील अवस्था स्वास्थ्य भएको र समयमै उपचार गर्न नपाए ज्यान पनि जान सक्छ, त्यसैले पनि राज्यले दिन खोजेको सुविधाबाट यहाँका नागरिक वञ्चित नहून् भन्ने उद्देश्यले आफूले जग्गा उपलब्ध गराएको हो”, उनले भने ।
मालपोत कार्यालयका प्रमुख नवराज बरालले सरकारी कार्यालयका लागि व्यक्तिले निःशुल्क जग्गा उपलब्ध गराएमा मालपोतबाट पनि निःशुल्क पास गरिदिने व्यवस्था रहेको बताए ।
© copyright 2016-2019 and all right reserved to jaljalakhabar | Site By : sobij
