सामान्य असावधानीले हुन्छ आगलागी

काठमाडौं । मानवीय लापरबाही र असावधानीले काठमाडौं, ललितपुर र भक्तपुरमा डेढ बर्षको अवधिमा भएका आगलागीका घटनामा आठ जनाको मृत्यु भएको छ भने १२ जना घाइते भएका छन् ।
आगलागीबाट उपत्यकामा डेढ बर्षमा एक अर्ब रुपैयाँ भन्दा बढीको धनमाल खरानी भएको छ ।
महानगरीय प्रहरी कार्यालयको तथ्यांकले उपत्यकाका तीन जिल्लामा अघिल्लो आर्थिक बर्षयता (माघ १६ सम्म) दुइ सय १२ आगलागीका घटना भएको देखाउँछ ।

काठमाडौंमा अघिल्लो आर्थिक बर्ष ८३ स्थानमा आगलागी भएकोमा चालू आवको हालसम्म ५२ घटना भइसकेका छन् ।
काठमाडौंमै १० महिनाको अवधिमा जलेर ११ करोड रुपैयाँ बराबरको धनमाल जलेर नष्ट भएको छ ।
अघिल्लो आर्थिक बर्ष १७ करोड रुपैयाँ बराबरको धनमाल जलेर नष्ट भएको थियो ।

‘बजारमा थरीथरीका विद्युतीय उपकरण आएका छन्, प्रयोगमा हुने लापरबाही र असावधानी आगलागीको कारण हो ।’ जुद्ध बारुण यन्त्रालयका प्रमुख किशोर भट्टराईले भने ‘ग्यास लिक भएर पनि आगलागी भएको पाएका छौं ।’