लोडसेडिङ हटेसँगै चितवनबासी खुसी

काठमाडौं । आफ्नो जिल्ला लोडसेडिङमुक्त घोषणा भएपछि चितवनका नागरिकमा खुसी छाएको छ ।
चितवनका नागरिकले नेपाल विद्युत प्राधिरणको कदम प्रशंसायोग्य भएको भन्दै अब कहिल्यै लोडसेडिङको सामना गर्न नपरोस् भन्ने चाहेका छन् ।

बिहीबार औपचारिक रुपमा नै प्राधिकरणले चितवनलाई लोडसेडिङमुक्त घोषणा गरेपछि चितवनबासी निकै उत्साहित भएका छन् । लामो समयदेखि लोडसेडिङको मार खेपिरहेका चितवनबासीले प्राधिकरणको सकारात्मक प्रयासको मुक्तकण्ठले प्रशंसा गर्दै आवश्यक परे आफूहरुले पनि प्राधिकरणलाई सक्दो सहयोग गर्ने प्रतिवद्धता व्यक्त गरेका छन् ।

प्राधिकरणले चितवनका औद्योगिक फिडरबाहेकका क्षेत्रलाई लोडसेडिङमुक्त बनाएको हो । क्रमशः औद्योगिक क्षेत्रमा हुँदै आएको लोडसेडिङ पनि हटाउने प्राधिकरण जनाएको छ । चितवनका स्थानीयले पनि अब छिट्टै औद्योगिक क्षेत्रमा हुँदै आएको लोडसेडिङ पनि अन्त्य होस् भन्ने चाहेका छन् ।

चितवनको भरतपुर प्राधिकरण शाखाअन्तर्गत ६८ हजार ग्राहक छन् भने टाँडीअन्तर्गत ५० हजार ग्राहक छन् ।
यसअघि सरकारले काठमाडौँ र पोखरालाई लोडसेडिङमुक्त घोषणा गरिसकेको छ ।