त्रिशुलीमा बोलेरो पिकअप खस्यो, दुई जना वेपत्ता

चितवन । चितवनबाट गोर्खा जाँदै गरेको बोलेरो पिकअप जीप त्रिशुली नदीमा खस्दा दुई जना वेपत्ता भएका छन् ।

चार जनाको भने सकुशल उद्धार गरिएको छ । पूर्वी चितवनको खैरहनीवाट गोर्खा जाँदै गरेको ना ३ च ७५४३ नम्बरको जीप आज विहान ३ बजे कविलास गाविस– ४ सत्रकिलो भन्ने स्थानबाट त्रिशुली नदीमा खसेको हो ।

वेपत्ता भएका गोर्खा टाकु गाविस ६ का ६५ वर्षीय विष्णुमाया गुरुङ र १३ वर्षीय कविन गुरुङको खोजी भइरहेको चितवन प्रहरीले जनाएको छ ।

रिजर्भ गरी कोठाको सामानसहित ६ जना चढेको उक्त पिकअप अनियन्त्रित भई दुर्घटना भएको प्रहरीले जनाएको छ ।

घाइते चार जनाको चितवनको मेडिकल कलेजमा उपचार भैरहेको छ । उनीहरुको अवस्था सामान्य छ । प्रहरी चौकी जुगेडी र इलाका प्रहरी कार्यालय मुग्लिनको टोलीले घाइतेको उद्धार गरेको हो ।