भैरहवाको रोयल क्यासिनोमा छापा, म्यानेजरसहित १९ जना पक्राउ

काठमाडौँ । भैरहवास्थित रोयल कालिंगा क्यासिनोबाट म्यानेजरसहित १९ नेपालीलाई प्रहरीले पक्राउ गरेको छ ।

गौतमबुद्ध अन्तर्राष्ट्रिय विमानस्थल नजिकै रहेको गौतमबुद्ध इन्टरनेसनल होटलमा सञ्चालित क्यासिनोमा कानूनविपरीत बरामद गरी जुवा खेलाउने सूचनाका आधारमा उनीहरुलाई प्रहरीले पक्राउ गरिएको हो ।

लुम्बिनी प्रदेश प्रहरी कार्यालय र जिल्ला प्रहरी कार्यालय रुपन्देहीबाट खटिएको संयुक्त प्रहरी टोलीले सिद्धार्थनगर नगरपालिका–१० स्थित रहेको क्यासिनोमा चेकजाँच गर्दा जुवा खेल्ने र खेलाउने कार्यमा संग्लन १९ जनालाई नियन्त्रणमा लिइएको रुपन्देही प्रहरीका सूचना अधिकारी कृष्णकुमार चन्दले जानकारी दिए ।

मंगलबार राति क्यासिनोमा जुवा खेलाउने कार्यमा ४ जना र खेल्ने १५ जनालाई नियन्त्रणमा लिइएको उनीहरूको साथबाट ९५ हजार ५ सय नेपाली रुपैयाँ, मोबाइल १७ थान, क्यासिनो क्वाइन २ सय थान बरामद भएको उनले बताए ।

पक्राउ परेकाहरूलाई नियन्त्रणमा लिएर घटनाका सम्बन्धमा थप अनुसन्धान भइरहेको जिल्ला प्रहरी कार्यालय रुपन्देहीले जनाएको छ । पक्राउ पर्नेमा रुपन्देही जिल्लाका १५ जना, काठमाडौँ, ललितपुर, गुल्मी, पर्साका एक–एक जना रहेका छन् ।