सामुदायिक वनद्वारा सीमा सडक निर्माण

बैतडी । बैतडीको दुर्गम शिवनाथ गाउँपालिका शर्मालीमा रहेको अमरगढी सामुदायिक उपभोक्ता वनले आफ्नै लगानी सीमा नाका जोड्ने २६ किलोमिटर सडक निर्माण गरेको छ ।

एक करोड पाँच लाखमा सम्पन्न भएको उक्त सडकमा साविकको शर्माली गाविसवाट २५ लाखबाहेक अरु सबै रकम सामुदायिक बनको लगानीमा निर्माण भएको अमरगढी सामुदायिक उपभोक्ता वनका सदस्य कर्णसिंह साउदले जानकारी दिए । सडक निर्माणका लागि टेन्डर आह्वान गरी ठेक्का दिइएको हो ।

शिवनाथ गाउँपालिकाको सुल्लेखानदेखि नेपाल भारत सीमा जोड्ने नागार्जुन घाटसम्मको उक्त २६ किलोमिटर सडक निर्माण गरिएको हो । अमरगढी सामुदायिक उपभोक्ता वनले हिमाल रोजिन कम्पनीसँग सल्लाको खोटो सङ्कलन गर्न दिने गरी सम्झौता भएको उनले बताए ।

सुल्लेखानदेखि बस्कोटीसम्मको ११ किलोमिटर सडक गत वर्ष निर्माण गरिएको हो भने बस्कोटीदेखि नागार्जुन घाटसम्मको १५ किलोमिटर सडक यो वर्ष निर्माण सम्पन्न भएको हो ।

हिमाल रोजिन कम्पनीलाई अझै पनि रु ४० लाख तिर्न बाँकी रहेको समेत साउदले जानकारी दिए । हाल उक्त सडक निर्माण भएपछि त्यो क्षेत्रका नागरिकलाई सजिलो भएको शिवनाथ–१ की कमला चाँडले बताए ।