एनपीएलमा जनकपुर लुम्बिनीले दिएको १५० रनको चुनौती पछ्याउँदै

काठमाडौँ । नेपाल प्रिमियर लिग (एनपीएल) को तेस्रो संस्करणको १४ औँ खेलमा लुम्बिनी लायन्स र जनकपुर बोल्ट्स भिडिरहेका छन् । जनकपुरले १५० रनको चुनौती पछ्याइरहेको छ ।

खेलमा लुम्बिनीले टस हारेर पहिले ब्याटिङ गर्दै ८ विकेटको क्षतिमा १४९ रन बनायो । कप्तान रोहित पौडेलले ३० बलमा ३४ रन बनाए । त्यस्तै निरोशन डिकेवालाले २७ बलमा २७ रन बनाए ।  दिलिप नाथले १६ बलमा २५ रन जोडे ।

बिशाल शुस्लिङ र राहुल यादवले समान २ विकेट लिए ।

जवाफमा जनकपुर मैदानमा उत्रिइसकेको छ । जनकपुरले पहिलो ओभरमै विकेट गुमाएको छ ।

अंक तालिका

लुम्बिनी लायन्स अपराजित रहँदै ३ खेलमा ५ अंकसहित शीर्ष स्थानमा रहेको छ । ४ खेलमा ४ अंकसहित विराटनगर किंग्स दोस्रो स्थानमा छ । ३ खेलबाट ४ अंकको कर्णाली याक्स तेस्रो स्थानमा छ ।

४ खेलबाट ४ अंकको जनकपुर बोल्ट्स चौथो तथा ४ खेलबाट ४ अंककै सुदूरपश्चिम रोयल्स पाँचौँ स्थानमा छ ।

३ खेलबाट ३ अंकको चितवन राइनोज छैटौँ स्थानमा छ । २ खेलबाट २ अंकको काठमाडौँ गोर्खाज सातौँ स्थानमा छ ।

३ खेलबाट अंकविहीन पोखरा एभेन्जर्स पुछारमा छ ।

यसअघिका खेलको नतिजाः

-१३ औँ खेलमा लुम्बिनी लायन्स विजयी भएको छ । अपराजित रहँदै शीर्ष स्थानमा पुग्ने क्रममा लुम्बिनीले पोखरा एभेन्जर्सलाई मंगलबारको खेलमा ८ विकेटले पराजित गर्यो ।

-१२ औँ खेलमा विराटनगर किङ्ग्सले जनकपुर बोल्ट्सलाई २ रनले पराजित गरेको छ। विराटनगरले दिएको १७५ रनको चुनौतीपूर्ण लक्ष्य पछ्याएको जनकपुर बोल्ट्सले ७ विकेट गुमाएर १७२ रन मात्र बनाउन सक्यो।

-११ औँ खेलमा सुदूरपश्चिम रोयल्स विजयी भएको छ । सुदूरपश्चिमले चितवन राइनोजलाई ५ विकेटले हराएको हो । १३० रनको चुनौती सुदूरले १६ ओभर ४ बलमै ५ विकेटको क्षतिमा पूरा गरेको हो ।

– दशौँ खेलमा काठमाडौँ गोर्खाज विजयी भएको छ । पहिलो जित हासिल गर्ने क्रममा काठमाडौँले कर्णाली गोर्खाजलाई ४ विकेटले हरायो ।

– नवौँ खेलमा जनकपुर बोल्टस विजयी भएको छ । जनकपुरले पोखरा एभेन्जर्सलाई ९ रनले पराजित गरेको हो । १४८ रनको चुनौती पछ्याएको पोखराले ९ विकेटको क्षतिमा १३८ रनमात्र बनाउन सक्यो ।

-आठौँ खेलमा विराटनगर किंग्स विजयी भएको छ । लगातार दुई हारपछि पहिलो जित दर्ता गर्ने क्रममा विराटनगरले सुदूरपश्चिम रोयल्सलाई ३५ रनले पराजित गरेको हो ।

-सातौँ खेलमा चितवन राइनोज र लुम्बिनी लाइन्सले अंक बाँडेका छन् । वर्षाका कारण खेल स्थगित हुँदा उनीहरूले अंक बाँडेका हुन् ।

-छैटौँ खेलमा कर्णालीले विराटनगर किंग्सलाई ४ विकेटले पराजित गरेको छ । १८७ रनको चुनौती कर्णालीले १९ ओभर ५ बलमा ६ विकेटको क्षतिमा पूरा गर्यो । कप्तान सोमपाल कामीले ३२ बलमा अविजित रहँदै रन बनाए । यसअघि टस हारेर पहिले ब्याटिङ गरेको विराटनगरले ७ विकेटको क्षतिमा १८६ रन बनाएको थियो । लोकेश बमले ५२ बलमा ८७ रन जोड्दा सोमपालले ३३ रन खर्चेर ४ विकेट लिए ।

-पाँचौँ खेलमा जनकपुर बोल्ट्सले काठमाडौँ गोर्खाजलाई सहजै ८ विकेटले पराजित गरेको छ । ११६ रनको चुनौती पछ्याएको जनकपुरले १७ ओभर २ बलमै २ विकेट गुमाएर पूरा गर्यो ।

– चौथो खेलमा सुदूरपश्चिम रोयल्सले पोखरा एभेन्जर्सलाई ६ विकेटले हरायो । सुदूरपश्चिमले टस जितेर पहिले बलिङ गर्दै पोखरालाई १४५ रनमा रोक्यो । पोखराले ७ विकेटको क्षतिमा सो योगफल जोडेको हो । अर्जुन घर्तीले २५ बलमा अविजित रहँदै ४० रन जोडे । अनिल खरेलले ३ विकेट लिए । जवाफमा सुदूरले १६.५ ओभरमै ४ विकेटको क्षतिमा जित हासिल गर्यो । कप्तान दिपेन्द्र सिंह ऐरीले ३६ बलमा अविजित रहँदै ५१ रन बनाए । इशान पाण्डेले ३१ बलमा ३७ रन बनाए ।

-तेस्रो खेलमा कर्णाली याक्सले जनकपुर बोल्ट्समाथि १९ रनको रोमाञ्चक जित निकाल्यो । १३३ रनको चुनौती पछ्याएको जनकपुरले ३ बल खेल्न बाँकी छँदै अलआउट भएर ११३ रनमात्र बनाउन सक्यो । युनिश ठकुरी र हुसेन तलातले समान ३ तथा नन्दन यादवले २ विकेट लिए ।

-दोस्रो खेलमा चितवन राइनोजले विराटनगर किङ्ग्समाथि ८ रनको सनसनीपूर्ण जित हासिल गर्यो । १५८ रनको चुनौती पछ्याउने क्रममा विराटनगरले १४९ रनमात्र बनाउन सक्यो । कमल ऐरीले २६ रन खर्चेर ४ विकेट लिए ।

-पहिलो खेलमा लुम्बिनी लायन्सले सुदूरपश्चिम रोयल्सलाई ७ विकेटले हरायो ।