पञ्चायतकालमा वामपन्थी नेताहरूलाई आश्रय दिने रनधता पोखरेलको निधन

काठमाडौँ। निर्दलीय पञ्चायती व्यवस्थाको कठिन समयमा भूमिगत वामपन्थी नेताहरूलाई दोलखामा आश्रय दिँदै आएकी समाजसेवी रनधता पोखरेलको ९१ वर्षको उमेरमा निधन भएको छ। भक्तपुरको लोकन्थलीस्थित निवासमा बिहीबार साँझ उनको निधन भएको हो।

दिवङ्गत पोखरेलप्रति श्रद्धाञ्जली अर्पण गर्न नेकपा (एमाले)का अध्यक्ष केपी शर्मा ओली पशुपतिस्थित आर्यघाट पुगी उनको पार्थिव शरीरमा पार्टीको झण्डा ओढाएका थिए।

त्यसैगरी कानुन, न्याय तथा संसदीय मामिलामन्त्री सोविता गौतम, बागमती प्रदेशका मुख्यमन्त्री किरण थापा, पूर्वसभामुख देवराज घिमिरे, एमाले सचिव भानुभक्त ढकाल, पूर्वमन्त्री पार्वत गुरुङ लगायतका नेताहरूले आर्यघाट पुगेर मुलुकमा लोकतन्त्र स्थापनाका लागि उनले पुर्‍याउनुभएको योगदानको स्मरण गर्दै उच्च सम्मानका साथ श्रद्धाञ्जली अर्पण गरे।

पूर्वमन्त्री आनन्दप्रसाद पोखरेलकी आमा समेत रहनुभएकी स्व. पोखरेलले पञ्चायतकालको भूमिगत जीवनका क्रममा एमाले अध्यक्ष ओली, ईश्वर पोखरेल, अमृत बोहरा, केशव बडाल, माधव पौडेल लगायतका शीर्ष नेताहरूलाई आफ्नो घरमा आश्रय दिएका थिए। उनको आजै पशुपति आर्यघाटमा अन्त्येष्टि गरिएको छ। स्व. पोखरेलका दुई छोरा र दुई छोरी छन्।