“कलिलो उमेरदेखि नै योगको अभ्यास गरे युवा पुस्ता कुलतमा फस्दैन्”- प्रधानमन्त्री

काठमाडौं । आज विश्व योग दिवस । नेपालमा पनि योग तथा आध्यात्मको माध्यमबाट पर्यटन प्रवद्र्धन गर्ने उद्देश्यले योग दिवस मनाउन लागिएको हो ।

योगको महत्वलाई दृष्टिगत गर्दै संयुक्त राष्ट्रसंघले तीन वर्षअघि हरेक वर्ष जुन २१ मा विश्व योग दिवस मनाउने घोषणा गरेको थियो ।

यूनेस्कोले समेत योगलाई आफ्नो अभौतिक सांस्कृतिक सम्पदाको रुपमा सन् २०१६ मा दर्ता गरेको छ ।

दिवसकै अवसरमा राजधानीको प्रदर्शनीमार्गमा आयोजित योग समारोहको शुभारम्भ गर्दै प्रधानमन्त्री शेरवहादुर देउवाले शारीरिक र मानसिक स्वास्थ्यको पूर्णताको लागि योगको अभ्यास आवश्यक रहेको बताए ।

बालबालिकादेखिनै योगको अभ्यास गराउन सकिए युवा पुस्ता कुलतमा फस्न सक्ने समस्याबाट जोगाउन सकिने प्रधामन्त्री देउवाले बताए ।

उपप्रधान एवं शिक्षा मन्त्री गोपालमान श्रेष्ठले योग शिक्षालाई नेपालको शिक्षामा अनिवार्य गर्न सरकारले गृहकार्य गरेको जानकारी दिए ।

नेपाल सरकार शिक्षा मन्त्रालय र पतञ्जली योग नेपालको अगुवाईमा गरिएको कार्यक्रममा विशिष्ट योग साधक, मन्त्री, सांसद, निजामती कर्मचारी, व्यवसायी, सर्वसाधारण सहभागि बनेका थिए ।

उपस्थित सबैलाई योगगुरु लवदेव मिश्रले योग सिकाएका थिए । यद्यपि, विहानैदेखि पानी पर्दा योगमा सहभागि भएकाले सास्ती ब्यहोर्नुपरेको थियो ।

योगको अर्थ जोड्नु हो । योग एक विशेष क्रिया हो, योगक्रियाले मानिसको चेतना र शरीरबीचको सम्बन्धलाई जोड्ने काम गर्दछ ।

मन र मस्तिष्कको सम्बन्धलाई योग भनिने र योगबाट मानसिक शान्तिका साथै रोग प्रतिरोध क्षमताको समेत वृद्धि हुने विश्वास गरिएको छ ।

योगलाई ध्यानको आधार मानिन्छ, शारीरिक स्वास्थ्य, मानसिक स्वास्थ्य, ज्ञान, त्याग, वैराग्यता जस्ता योगका अनेकौं आयाम छन् ।

हजारौं वर्ष पहिले पतञ्जली नामका ऋषिले शुरुवात गर्नुभएको योगमा १९५ वटा योगसूत्र समाहित छन् ।

योगसूत्रको श्रेय भने आदियोगी भगवान् शिवलाई नै दिइन्छ ।

शिवबाट शुरुवात भएका योगविधाहरु क्रमशः सप्तऋृषिहरुमार्फत् पुस्तौं पुस्ता यात्रा गरेर हामीमाझ आइपुगेको विश्वास गरिन्छ ।