झुम्का हरायो….(भिडियो सहित)

काठमाडौं,१७ साउन— चार वर्ष इराकमा बसेर फर्केकी वर्षा लामाले तिज गीत बजारमा ल्याएकी छन् । गितमा उनले इराकमा बस्दा भोगेका र आफन्तको सम्झनाले सताउँदाका क्षणलाई उतारेकी छन् ।

आफूसँग करिब ४० वटा गीत ‘पाइपलाइन’मा रहेको तर सुरुवात भने तिज गीतबाट गरेको वर्षाले बताइन् । हालैमात्र उनले ‘थर्काइदेउ दम भए’ र ‘झुम्का हरायो’ गीति एल्बम बजारमा ल्याएकी छन् ।

दुवै गीत आलाप म्युजिक स्टुडियोले बजारमा ल्याएको हो ।
‘थर्काइदेउ दम भए’ गीतले राम्रो बजार लिने उनको अपेक्षा छ । यसमा केटा र केटीको जुहारी चल्छ ।

अर्को गीत भने ‘झुम्का हरायो’ बोलको छ । यसमा सन्तोष गन्धर्व र लामा दाजुले मोडलिङ गरेका छन् । दुवै गीतको भिडियो र मिक्सिङको काम भइसकेको लामाले बताइन् ।

इराकमा बस्दा लामाले थुप्रै गीत लेखिन् । “विदेशमा त खाँदा, बस्दा, बाहिर जाँदा, घरको याद आउँदा पनि गीत बन्ने रहेछ,” उनले आफ्नो अनुभव सुनाइन् । विदेशमा बस्दा लेखेका गीत रेकर्ड गर्दै लैजाने उनको योजना छ ।

उनको शब्द रहेको ‘जहिले नि उनको माया लाउनी’ बोलको गीतमा देवी घर्ती मगर र आशिष बिसीको स्वर छ । यो उनको पहिलो रेकर्डेड गीत हो । उनको शब्द रहेको दोस्रो गीत ‘राम्रो लाग्ने उनी’ सुरज थापा र टीका पुनको स्वरमा बजारमा आउँदैछ । यो गीतको भिडियोका लागि सुटिङ भइरहेको लामाले जानकारी दिइन् ।