अवरुद्ध सडक नखुल्दा तातोपानीवासी मर्कामा

चौतारा, १० साउन – अरनिको राजमार्गको बाह्रबिसे–तातोपानी सडक खण्डका विभिन्न ठाउँमा पहिरो र नदी कटानले अवरुद्ध सडक लामो समयसम्म खुलाउने प्रयास नभएपछि सिन्धुपाल्चोक तातोपानीका बासिन्दाको दैनिक जीवन कष्टकर बनेको छ ।

गत असार अन्तिम सातामा सो सडक खण्डको विभिन्न स्थानमा पहिरो र नदी कटानले अवरुद्ध भएको तीन साता बित्न लाग्दा पनि सम्बन्धित निकायले अझै खुलाउने प्रयास नगरेपछि स्थानीय बासिन्दाको आवागमनमा कठिनाई पुगेको हो ।

गत असार २६ गतेको अविरल वर्षाले भोटेकोशीको बहाब बढेपछि नौ किलो भन्ने स्थानमा ७० मिटर सडक नदीले कटान गरेको थियो ।

तातोपानी बजार क्षेत्रमा ५० मिटर र कोदारीस्थित इको रिसोर्ट नजिक ५० मिटर सडक पहिरो र नदी कटानले क्षत्विक्षत भएको छ । नौ किलोको सडक माथिल्लो भोटेकोशी जलविद्युत् आयोजनाको बाँधका कारण कटान भएकाले आयोजनाले नै बनाइदिने विषयमा छलफल भइरहेको र हाम्रोतर्फबाट पनि सम्बन्धित निकायमा बजेट माग गरिएको डिभिजन सडक कार्यालय दोलखाका प्रमुख जिल्ला इञ्जिनियर अशोक तिवारीले बताउनुभयो ।

नदीबाट उठाउन करीब ३० मिटर उचाइ पर्ने र माथि बस्ती भएकाले भित्तो काट्न पनि नमिल्ने हुँदा नदीको पानी घटेपछि काम गर्न सजिलो हुने जिल्ला इञ्जिनियर तिवारीको भनाइ छ ।

बाँध स्थलको सडक माथिल्लो भोटेकोशी जलविद्युत् आयोजनाकै कारण बिग्रेको हँुदा यस अघि आयोजनाले बनाइदिएको र अब उसैले बनाउनुपर्ने भोटेकोशी गाउँपालिकाका अध्यक्ष राजकुमार पौडेलको भनाइ छ ।