चौतारामा बाल विकास महोत्सव

चौतारा, २० साउन – सिन्धुपाल्चोकको चौतारामा आज प्रथम बाल विकास महोत्सव आयोजना गरिएको छ ।

बाल विकासको बारेमा के कस्ता काम भएको छ भन्ने जानकारी दिने उद्देश्यले सदर मुकामको टुँडिखेलमा १३ वटा नमूना कक्षमार्फत महोत्सव गरिएको हो । ती कक्षमा दुईदेखि पाँच वर्ष उमेर समूहका बालबालिकालाई पढाउने कक्षा कोष तथा पाठ्य सामग्री के कस्तो हुनुपर्छ भन्ने जानकारी गराइयो ।

त्यसैगरी स्तनपान सप्ताहअन्तर्गत गर्भवती अवस्था र शिशुको आमालाई पोषण तथा स्तनपान सम्बन्धमा जानकारी गराउने उद्देश्यले टुकी संध सुनकोशी सुआहारा कार्यक्रमको पनि छुटै स्थल राखेको छ ।

महोत्सवको प्रदेश नं ३ का सामाजिक विकासमन्त्री युवराज दुलालले उट्घाटन गर्नुभयो । सो अवसरमा मन्त्री दुलालले स्वस्थ र शिक्षित व्यक्तिले नै देश विकासमा बढी योगदान दिनसक्ने चर्चा गर्दै सुखी नेपाली र समृद्ध नेपाल बनाउन सबैले इमान्दारिताका साथ लागीपर्न आग्रह गर्नुभयो ।

महोत्सवमा राखेको कक्षमध्ये प्रथम, द्वितीय र तृतीय हुनेलाई पुरस्कृत गरिएको थियो । तेह्र प्रदर्शनी कक्षमध्ये सागाचोक बाल विकास केन्द्र प्रथम, बाल विकास क्षेत्र कुञ्चोक द्वितीय र पिपलडाँडा स्याउने बाल विकास केन्द्र तृतीय भएका थिए । जिल्लामा ५२८ विद्यालय र ३५२ बाल विकास केन्द्र छन् ।
–––