अपहरणमा परेका भनिएका डा. यादव समातिए

लहान, असोज १० । सिरहाको लहानबाट मंगलबार साँझ अपहरणमा परेका भनिएका डा. सुभाष यादवलाई मंगलबार राति ११ बजे प्रहरीले फेलापारेको छ ।

सप्तरीको मल्हनिया–२ निवासी डा. यादवलाई प्रहरीले सर्लाहीको नवलपुरमा फेलापारेको हो ।

अर्की युवतीसँग प्रेमविवाह गरेको थाहा पाएर उनकी श्रीमती र ससुरालीले त्यो सम्बन्ध छुटाउनका लागि डा. यादवलाई विगत एक महिनादेखि लहानमै राखिरहेका थिए ।

मंगलबार साँझ बजार घुम्न निस्किएका डा. यादव जिपमा चढेर एकाएक फरार भएपछि अपहरणको हल्ला चलेको थियो ।

सम्पर्क हुन छाडेपछि उनका आफन्तले अपहरणमा परेको हुनसक्ने भन्दै प्रहरीमा खबर गरेका थिए ।

अपहरणमा परेको सूचना पाएलगत्तै इलाका प्रहरी कार्यालय लहानबाट खटिएको प्रहरी टोलीले डा. यादवलाई सर्लाहीको नवलपुरमा चेकजाँचकाक्रममा फेलापारेको प्रहरी नायब उपरीक्षक राजेश थापाले जानकारी दिए ।

यादवसँगै उनलाई भाग्न सहयोग गर्ने एक सहयोगीलाई पनि प्रहरीले नियन्त्रणमा लिएको छ । रासस