बाँकेमा ट्रक र माइक्रो ठोक्किँदा ६ को मृत्यु

ट्रक र माइक्रो एकआपसमा ठोक्किँदा ६ जनाको मृत्यु भएको छ।

दाङबाट नेपालगन्जतर्फ आइरहेको रा १ ख १६६२ माइक्रोभ्यान र पश्चिमबाट पूर्वतर्फ गइरहेको ले १ ख ७७२९ नम्बरको ट्रक पूर्वपश्चिम हाइवेमा ठोक्किँदा ६ जनाको मृत्यु बाँकेका प्रमुख जिल्ला अधिकारी मदन भुजेलले सेतोपाटीलाई जानकारी दिएका हुन्।

घटनामा घाइते १७ जनाको कोहलपुर मेडिकल कलेजमा उपचार भइरहेको छ।

भुजेलका अनुसार घटनस्थलमा माइक्रो चालक र ३ महिला यात्रुको निधन भएको हो भने थप दुई जनाको उपचारका क्रममा निधन भएको हो।

दुर्घटना राप्ती सोनारी गाउँपालिका-२ को मुगुवा खोलाभन्दा पूर्वपट्टी पर्छ। घटनाको विस्तृत विवरण केहीबेरमा थाहा हुने जानकारी पनि उनले सेतोपाटीलाई गराएका छन्।

प्रहरीले ट्रकका चालकलाई नियन्त्रणमा लिइसकेको भुजेलले बताए। घटना बिहान ८ बजेर ५५ मिनेटमा भएको हो।