डडेल्धुरा बस दुर्घटनाका घाइतेहरुको उपचारमा आर्थिक समस्या

कैलाली, मंसिर १३ । डडेल्धुराको रडुवाखोलामा भएको यात्रीबस दुर्घटनामा घाइते भएकाहरूको उपचारमा आर्थिक समस्या देखिएको छ ।

धनगढीमा उपचार गराइरहेका घाइतेका आफन्तले आर्थिक अभावका कारण उपचारमा समस्या भएको बताएका छन् ।

सुरुका दिन सुदूरपश्चिम प्रदेशका मुख्यमन्त्री त्रिलोचन भट्टसहित नेताहरूले उपचारमा सहयोग गर्ने आश्वासन दिएपनि अहिलेसम्म आफ्नै पैसाले उपचार गराइरहेको उनीहरुको गुनासो छ ।

यही मंसिर ६ गते डडेल्धुरा, रडुवाखोलामा भएको बस दुर्घटनामा १८ जनाको मृत्यु भएको थियो । २७ जना घाइते भएका थिए ।

घाइतेहरुलाई जापानमा अध्ययनरत् विद्यार्थीहरुले २० हजार रुपैयाँ सहयोग प्रदान गरेका थिए ।

प्रदेश सरकार, विभिन्न दलका नेता, सांसदहरुले घाइतेरुको सम्पूर्ण उपचार खर्च व्यहोर्ने घोषणा गरेपनि अहिलेसम्म सहयोग दिएका छैनन् ।

घाइतेहरुको धनगढीस्थित सेती अञ्चल अस्पतालमा उपचार भइरहेको छ ।