के थियो धर्मेन्द्रको त्यो फोनको वास्तविकता जसले टुटेको थियो हेमा–जितेन्द्रको विवाह !

बलिउडकी ड्रिम गर्ल भनेर चिनिने हेमा मालिनी एक जमानामा निकै चर्चित हिरोहरुको ड्रिम गर्ल हुने गर्दथिन् । त्यतिबेला थुप्रै हिरोहरु हेमालाई आफ्नी दुलही बनाउने सपना बुन्दथे । तर उनले धर्मेन्द्रसँग विवाह गरिन् ।

कुरा सन् १९७४ तिरको हो, जब हेमासँग एकजना होइन, तीनजना ठूला अभिनेता विवाह गर्न चाहन्थे । संजीव कुमार, जितेन्द्र र धर्मेन्द्र तीनैजना हेमासँग विवाह गर्न चाहन्थे ।

यता हेमाको नाम विवाहित ४ बच्चाका पिता धर्मेन्द्रसँग जोडिन सुरु भइसकेको थियो भने उता संजीव कुमार हेमालाई मनमनै मन पराउन सुरु गरिसकेका थिए । हेमा र धर्मेन्द्रको सम्बन्धको खबर हेमाको परिवारलाई मन परेको थिएन ।

उपयुक्त समय हेरेर संजीवले आफ्नो आमाबुवालाई हेमाको घरमा विवाहको प्रस्तावसहित पठाए तर हेमाकी आमाले छोरीको विवाहको लागि उमेर नपुगेको भन्दै उनीहरुको प्रस्तावलाई अस्विकार गरिन् ।

हेमाको परिवारबाट नकारात्मक उत्तर आएपछि पनि संजीवले हार मानेनन् र आफ्नो साथी जितेन्द्रलाई विवाहको प्रस्तावसहित पठाए । जितेन्द्रले संजीव सोझो र अहिलेसम्म विवाह नभएको भनेर हेमालाई विवाहको लागि राजी हुन सम्झाए तर हेमाले आफूलाई संजीव मन त पर्ने तर विवाह गर्न नसक्ने बताइन् ।

हेमाले अस्विकार गरेपछि संजीव निकै आहत भए । त्यतिबेला छापिएका खबर अनुसार हेमाले अस्विकार गरेपछि संजीवले रक्सी पिउन सुरु गरे । अत्यधिक रक्सी पिउनाले उनको स्वास्थ्य दिनानुदिन बिग्रँदै गयो ।

कहानीमा ट्विस्ट त्यतिबेला भयो जब संजीवसँग विवाहको लागि अस्विकार गरेपछि जितेन्द्रले पनि मौकामा चौका हाने । जितेन्द्र पनि हेमालाई प्रेम गर्न थालिसकेका थिए त्यसकारण उनले पनि हेमालाई प्रेमको प्रस्ताव गरे ।

जितेन्द्रले प्रेमको प्रस्ताव गरेपछि हेमा सोचमग्न भइन् । आफू धर्मेन्द्रसँग सम्बन्ध रहेको तर विवाहित धर्मेन्द्रसँग विवाह गरेपछि आफ्नो अवस्था कस्तो रहला भन्ने उनी चिन्तामा थिइन् । अझ जितेन्द्रले प्रेमको प्रस्ताव गरेपछि उनी झन् तनावमा रहिन् । यता धर्मेन्द्र पनि आफ्नी श्रीमती र बच्चाका कारण हेमासँगको सम्बन्धलाई कुन रुप दिने भन्नेमा सोचमग्न थिए ।

जितेन्द्र एक्लो थिए त्यसकारण हेमाका लागि उनलाई अस्विकार गर्नु निकै गाह्रो थियो । फिल्म ‘दुल्हन’ को सुटिङका क्रममा दुबैले एक अर्कासँग धेरै समय बिताए । फिल्मको सुटिङ समाप्त भएलगत्तै जितेन्द्र आफ्ना आमाबुवासँग हेमाको घर पुगे । दुबै परिवारबिच कुराकानी भइरहेको थियो, त्यतिबेला धर्मेन्द्रको फोन आयो र उनले रिसाउँदै हेमालाई भने, कुनै पनि निर्णय लिनु पहिले मलाई एकपटक भेट ।’ हेमा धर्मेन्द्रको यो फोनपछि सोचमग्न भइन् । फोनपछि हेमाले आफ्नो निर्णय परिवर्तन नगरोस् भन्ने उद्देश्यले जितेन्द्रले तिरुपती मन्दिरमा विवाह गर्ने निर्णय गरे । हेमाले विवाह बारे सोचिरहेकी थिइन्, त्यतिबेला नै उनको घरमा पुनः फोनको घण्टी बज्यो, यसपटकको फोन जितेन्द्रकी प्रेमिका शोभाको थियो । उनले आफूहरु निकै गहिरो प्रेममा परेका कारण जितेन्द्रसँगको विवाहबारे पुनः एकपटक सोच्न आग्रह गरिन् । हेमालाई लगातार कहिले धर्मेन्द्रको फोन आइरहेको थियो भने कहिले शोभाको । उनी तनावमा थिइन् । हेमासँग विवाह गर्ने जितेन्द्रको इच्छा अधुरो रह्यो र अन्तमा सन् १९७६ मा जितेन्द्रले आफ्नी प्रेमिका शोभासँग विवाह गरे ।

यता हेमाका पिता धर्मेन्द्रसँग छोरीको विवाह गर्न राजी थिएनन् त्यसकारण उनी छोरीको विवाहका लागि अर्को युवक खोजिरहेका थिए । तर हेमाका लागि धर्मेन्द्र बिना बाँच्नु भनेको पानी बिनाको माछा सरह थियो । दुबैको प्रेम दिनप्रतिदिन झाङ्गिँदै थियो । यता धर्मेन्द्रले आफ्नी पहिलोृ श्रीमती प्रकाश कौरको बारेमा केही कुरा नगरिकनै हेमासँगको आफ्नो सम्बन्ध स्विकार गर्न थालिसकेका थिए । सन् १९७६ मा एक म्यागजिनलाई दिएको अन्र्तवार्तामा यी दुबैले आफ्नो सम्बन्धलाई स्विकार गरेका थिए । समय आफ्नै गतीमा चलिरहेको थियो र उनीहरुको सम्बन्ध पनि झाङ्गिँदै थियो, यहिबेला हेमाको पिताको मृत्यु भयो । हेमाको जिन्दगीको यो दुखद घडीमा धर्मेन्द्रले उनलाई साथ दिए ।

धर्मेन्द्रकी पहिलो श्रीमती सम्बन्धविच्छेद गर्न तयार थिइनन् त्यसकारण दुबैले इस्लाम कबूलेर विवाह गर्ने निर्णय गरे । दुबैले चुपचाप विवाह गरे । त्यसपछि सन् १९८० मा दुबैले हिन्दु रितिरिवाज अनुसार विवाह गरे । यसप्रकारले हेमा धर्मेन्द्रकी दोस्रो श्रीमती भइन् । दुबैको दुई छोरी ऐशा र ईशा छन् ।