ब्यापारिहरुद्धारा असहमति पत्र

शिबराज पन्थी, २३ पुष,गढवा । गढवा गाउँपालिका वडा नं. ६ को कार्यालय बाहिर विगत ३० बर्ष अगाडीदेखि ब्यापार ब्यवसाय संचालन गर्दै आएका ११ जना ब्यापारिहरुले सोमवार गढवा गाउँपालिकामा ब्यापारिक सटरहरु टेण्डर हुन थालेको भन्दै असहमति पत्र बुझाएका छन् ।

साबिक गाविस रहदा ३० बर्ष अगाडी देखि आफुहरुले गाउँपालिकाका ब्यापारिक सटरहरुमा ब्यापार ब्यवसाय संचालन गर्दै आएकोमा मिति २०७५ पौष २२ गते बसेको कार्यपालिकाको बैठकले आफूहरुलाई बिस्थापित गर्ने अभिप्रायका साथ सटरहरुको दररेट तोकी टेण्डर प्रकृयामा लैजान थालेको उनिहरुको आरोप रहेको छ ।

एघारजना ब्यवसायिहरुको हस्ताक्षर रहेको सो असहमति पत्रमा भनिएको छ हामीलाई उपस्थित गराएर छलफल नगराई एकाएक टेण्डरमा लगिएको हुदा तोकिएको भाडादर तिरेर हामीले नै पाउनु पर्छ, रोहवरमा राखेर छलफल गराइ उचित निर्णय लिइयोस भन्ने आव्हान गरिएको छ । एता यसै बिषयलाई लिएर भोलि बिहान गढवा उद्योग बाणिज्य संघले बृहत बैठक बोलाएको संघका अध्यक्ष रविलाल आचार्यले जानकारी दिनु भयो ।