प्रतिदिन १७ जनासँग सहवास गर्दै श्रमिक महिला

काठमाडौंँ । गरिबिको अभावका कारण घरको खर्च धान्न नसकिएपछि महिलाहरु बाध्यता वस यौन व्यापार गर्न मजबुर हुन्छन । यौन व्यापार अहिले बढ्दो स्थितिमा छ । त्यस्तै काठमाडौंँ उपत्यकामा सञ्चालित रात्रिकालीन मनोरञ्जन क्षेत्रमा कार्यरत एक महिला श्रमिकले प्रतिदिन १७ जना ग्राहकसँग शारीरिक सम्वन्ध राख्ने गरेको पाइएको छ ।

काठमाडौं महानगरपालिका वडा नम्वर–३२ कोटेश्वर क्षेत्रमा सञ्चालित होटल, गेष्टहाउस, डान्स, दोहोरी, क्याविन र खाजाघरमा कार्यरत श्रमिक महिलाका बारेमा गरिएको अध्ययनले यस्तो तथ्य उजागर गरेको हो ।

अध्ययन प्रतिवेदन प्रस्तुत गर्दै अनुसन्धानकर्ता बुद्धिकुमार श्रेष्ठले मनोरञ्जनक्षेत्रमा कार्यरत श्रमिक महिला, किशोरकिशोरी र बालबालिकाको अवस्था निकै दयनीय र कारुणिक रहेको बताए ।

कामनपा वडा नम्वर–३२ मा सञ्चालित ५५ वटा ब्यवसायमा कार्यरत एक सय जना महिला तथा बालबालिकालाई लक्षित गरी अध्ययन गरिएको थियो । कुल २९४ जना श्रमिक मध्ये ६५ प्रतिशत आदिवासी जनजाति, ३२ प्रतिशत क्षेत्री–बाहुन र तीन प्रतिशत दलित छन् ।

१५ वर्षमुनिकै उमेरमा काम खोज्न आउनेको संख्या ३२ प्रतिशत छ । आर्थिक अवस्था, पारिवारिक समस्या र साथीसङ्गीको लहडमा शहरमा पस्ने युवतीको पहिलो छनोटमा रेष्टुराँ तथा होटल ब्यवसाय हुने गरेको पाइएको छ ।

भट्टीका रूपमा परिचित खाजाघरबाट क्याविन, होटल र गेष्टहाउस हुँदै उनीहरू डिस्कोसम्म पुग्छन् । यसक्षेत्रमा कार्यरत ३७ प्रतिशत महिलाले अबैध र असुरक्षित सम्वन्धका कारण जन्मेको बच्चाकोे बाबुसमेत भन्न नसक्ने गरेको अध्ययनले देखाएको छ ।

यस्ता महिलाले दैनिक १६ घण्टा काम गरे पनि मासिक १० हजार रुपियाँको हाराहारीमात्र तलव पाउने गरेको अध्ययनले देखाएको छ । राष्ट्रिय महिला आयोगका सचिव अनिलकुमार ठाकुरले गैरसरकारी संघसंस्थासँगको सहकार्यमा महिलामाथि हुने सबै किसिमका हिंसा नियन्त्रण कार्यमा केही सहज भइरहेको बताए ।

छोरी संस्थाका प्रमुख हीरा दाहालले मनोरञ्जन क्षेत्रलाई ब्यवस्थित, मर्यादित र हिंसामुक्त बनाउन कानुन कार्यान्वयनमा कडाइ गर्न आवश्यक रहेको बताए । महानगरीय प्रहरी परिसर काठमाडौंका प्रमुख बसन्त लामाले काठमाडौंमा सञ्चालित कतिपय डिस्को, क्याविन, मसाज पार्लर आदिमा देहब्यापार हुने गरेको बताउँदै तिनमा बेलाबखत छापा मार्ने गरेको जानकारी दिए ।