भोजपुरको पहिरो अध्ययनका लागि भूगर्भविद् ल्याउने

भोजपुर  । जिल्ला दैवी प्रकोप उद्वार समिति भोजपुरले पहिरोको उच्च जोखिममा रहेका क्षेत्रको अध्ययनका लागि भूगर्भविद् ल्याउने निर्णय गरेको छ ।

प्रमुख जिल्ला अधिकारी अर्जुनकुमार शर्माको अध्यक्षतामा बिहीबार यहाँ बसेको बैठकले सिद्धेश्वर गाविस– ८ मा पर्ने भण्डारी टोल पहिरोको उच्च जोखिममा रहेकाले त्यसको अध्ययनको लागि यस्तोे निर्णय गरेको हो । जिल्लाको उत्तरी कुलुङ र दोभाने गाविसको पहिरोग्रस्त क्षेत्रको समेत अध्ययन गराउने बैठकले निर्णय गरेको छ ।

त्यस्तै बैठकले गत असोजयता जिल्ला प्रशासन कार्यालयमा दर्ता भएका २१ वटा दैवीप्रकोप घटनाको सत्यतथ्य अध्ययन गरी १५ दिनभित्र प्रतिवेदन पेस गर्न जिल्ला प्राविधिक कार्यालयका इन्जिनियर राजनराज रेड्डीको संयोजकत्वमा चार सदस्यीय कार्यदल समेत गठन गरेको छ ।

कार्यदलको सिफारिसको आधारमा दैवीप्रकोप उद्वार समितिले राहत वितरण गर्ने जनाएको छ ।