डडेल्धुरामा आगलागी हुँदा ८ वर्षीया बालिकाको मृत्यु, एक गम्भिर घाइते

डडेल्धुरा । डडेल्धुरामा आगलागी हुँदा एक बालिकाको मृत्यु भएको छ भने एक गम्भिर घाइते भएकी छन्।

मंगलबार राती करिब सवा ८ बजेतिर जिल्लाको आलिताल गाउँपालिका ८ गोदामबजारमा आगलागी हुँदा स्थानीय उत्तम थापाको छोरी ८ वर्षीया आरती थापाको मृत्यु भएको छ।

साथै आगलागीमा परी उत्तम थापाकै १९ वर्षीया छोरी निरुता थापा गम्भिर घाइते भएकी छन्। उनलाई उपचारका लागि जोगबुडा स्वास्थ्य केन्द्र हुँदै घनगढी पठाइएको जिल्ला प्रहरी कार्यालय डडेल्धुराले जनाएको छ।

थापाको किराना पसलबाट लागेको आगोले संगैका छिमेकी रामबहादुर धामी, दिलबहादुर रानाको घरसहित जल्दा डोजर लगाएर आगो नियन्त्रणमा ल्याएको जिल्ला प्रहरी कार्यालय डडेल्धुराका प्रहरी निरीक्षक ईश्वरीदत्त पाण्डेले जानकारी दिए।

डिसी नेपालसंग कुरा गर्दै उनले भने, ‘पानी परेका कारण बिजुली बत्ती गएको र त्यसै बखतमा थापा दिदीबहिनी मैनबत्ती बालेर किताब पढीरहेका बेलामा मैनबत्ती सकिएर नजिकैको चाउँचाउको पेटीमा आगो लागेर मृत्यु भएको जानकारी आएको छ।’

आगोमा जल्दै गरेकी छोरी बाहिर आएपछि परिवारका सदस्यले जानकारी पाएको बताइएको छ। आगलागीमा अन्य क्षति भने एकीन जानकारी नआएको प्रहरी निरीक्षक पाण्डेले जनाए।