बैतडीको पाटन तनावग्रस्त, प्रहरीद्वारा अश्रुग्यास र हवाई फायर

बैतडी । बैतडीको पाटनमा ग्रेडरले किचेर एक विद्यार्थीको मृत्यु भएपछि दोषीमाथी कारवाही र पीडित परिवारलाई क्षतिपूर्तीको माग गर्दै स्थानीयले चर्काएको आन्दोलनका कारण उक्त क्षेत्र तनाबग्रस्त बनेको छ ।

मृतकका आक्रोसित आफन्त र विद्यार्थीले राजमार्ग बन्द गराएर इलाका प्रहरी कार्यालय पाटनमा ढुंंगामुढा प्रहार गर्न थालेपछि स्थिति तनावग्रस्त बनेको हो ।

आक्रोसित भीडले ढुंगामुढा प्रहार गर्न थालेपछि भीडलाई तितरबितर पार्न प्रहरीले हवाइ फायर र अश्रुग्याँस प्रहार गरेको जनाएको छ ।

इलाका प्रहरी कार्यालय भित्र घटनाका बिषयमा छलफल भईरहेका बेला बाहिरबाट ढुंगामुढा प्रहार भएपछि प्रहरीले अश्रुग्यास र हवाई फायर गरेको बैतडीका प्रहरी प्रमुख प्रहरी नायव उपरीक्षक नेत्रमणी गिरीले जानकारी दिए ।

स्थिति नियन्त्रणमा लिन प्रहरीले लाठीचार्ज समेत गरेको छ । प्रहरीको लाठीचार्जबाट दुईजना विद्यार्थी घाइते भएका छन् ।

हिजो साँझ पाटनस्थित भीमदत्त पोलिटेक्निल इन्स्च्यिुटमा अध्ययनरत पाटन नगरपालिका २ का १९ बर्षीय पूर्णानन्द पाण्डेयलाई ग्रेडरले किच्दा उनको घटनास्थलमा मृत्यु भएको थियो भने ग्रेडर चालक अझै फरार छन् ।