युएस–बंगला विमान दुर्घटनाको एक वर्ष : बाँचेकाहरु भेला भए ठमेलमा

काठमाडौँ । गत वर्ष फागुन २८ गते त्रिभुवन अन्तर्राष्ट्रिय विमानस्थलमा ६७ यात्रु र चालक दलका चार सदस्य सवार युएस–बंगला एयरलाइन्सको विमान अवतरणको क्रममा दुर्घटना भयो ।

विमानमा ३३ जना नेपाली, ३२ जना बंगलादेशी, चालक दलका ४ तथा चीन र माल्दिभ्सका एक–एकजना सवार थिए । यात्रुले टनाटन भरिएको युएस–बंगला विमान दुर्घटनामा ५१ जनाको ज्यान गयो । त्यसमध्ये २० जनाको ज्यान जोगियो ।

विमान दुर्घटनामा ज्यान गुमाउनेमा २२ जना नेपाली, २८ जना बांगलादेशी र एक चिनियाँ नागरिक थिए । ज्यान गुमाउनेहरुको परिवारको निम्ति आज शोकको दिन हो भने सकुशल बाँचेका २० जनाको लागि आज पुर्नजन्म हो ।

यस्तै सकुशल बाँचेका २० जनामध्ये ८ जनाले आज दिउँसो ठमेलस्थित छाया कम्प्लेक्सको ग्राउन्ड फ्लोरमा भेला भएर खुसी साटासाट गरेका छन् । विमान दुर्घटनामा परेर घाइते भएका केशव पाण्डे भन्छन्, ‘आज हामी भेला भएर विमान दुर्घटनाको एक वर्षको अनुभव साटासाट गर्दै पहिलो जन्मोत्सव (पुर्नजन्म) मनाएका छौं ।’

भेलामा पाण्डेसहित सनम शाक्य, दयाराम ताम्राकार, आशिष रन्जित, विनोदराज पौडेल, वसन्त बोहोरा, हरिप्रसाद सुवेदी र किशोर त्रिपाठी सहभागि थिए । यस्तै दुर्घटनामा बाँचेका अर्का दिनेश हुमागाईं भने कामविशेषले त्यहाँ उपस्थित हुन सकेनन् ।

दुर्घटनामा परेर बाँचेका उनीहरूलाई मंगलबार बिहानैबाट आफन्त र साथीभाइले सामाजिक सञ्जाल फेसबुक, ट्विट, इन्स्टामार्फत जन्मदिनको बधाइ र शुभकामना दिएका छन् ।

भेलामा खुसी साटासाट गर्दै विमान दुर्घटना हुन लाग्दाको त्यो कहाली लाग्दो समय र नयाँ जीवन पाएपछिको एक वर्षको अनुभवबारे कुराकानी भएको दुर्घटनामा बाँचेका सनम शाक्य बताउँछन् ।

ट्राभल एजेन्सीमा आबद्ध १२ जनाको टोली एक वर्षअघि बंगालादेशको राजधानी ढाकामा आयोजित पर्यटनसम्बन्धी कार्यक्रममा भाग लिएर फर्कँदै गर्दा उक्त विमान सवा २ बजे दुर्घटनामा परेको थियो ।

बंगलादेशको ढाकामा रहेको शाहजलाल अन्तर्राष्ट्रिय विमानस्थलबाट उडेको बमबार्डियर डाश एच क्यु ४०० विमान अवतरणको क्रममा दुर्घटनाग्रस्त भएको थियो । दुर्घटनापछि भएको अनुसन्धानमा पाइलटको कमजोरीका कारण दुर्घटना भएको देखिएको छ ।