गर्भपतन गराउने औषधि : महंगो मूल्य, अवैध बिक्री

डडेल्धुरा, साउन ८ – सुदूरपश्चिमका सबै जिल्लामा औषधि पसल खुल्ने क्रम तीब्र भएको छ । गएको आर्थिक बर्ष २०७२÷०७३ सम्मको तथ्याङ्क अनुसार सुदूरपश्चिममा औषधि बेच्ने १३ सय ७१ पसल खुलेका छन् ।

फुटरक औषधि बिक्रि गर्नसेती अञ्चलमा ९ सय ५४ र महाकाली अञ्चलका जिल्लामा चार सय १७ वटा सञ्चालनको लागि दर्ता भएको औषधि व्यवस्था विभाग नेपालगञ्जको तथ्याङ्कमा उल्लेख छ । जिल्लागत रुपमा सबैभन्दा बढी कैलालीमा सात सय १७ वटा त्यस्ता पसलहरु खुलेका छन् भने सबैभन्दा कम दार्चुलामा १७ वटा छन् ।

तथ्याङ्क अनुसार डडेल्धुरामा ५६, बैतडीमा ७३, कञ्चनपुरमा दुई सय ७१, बझाङमा ३३, बाजुरामा ३१, अछाममा एक सय आठ, डोटीमा ६५ वटा औषधि पसल दर्ता भएको औषधी व्यवस्था विभाग नेपालगञ्जका फार्मेसी निरीक्षक पुष्प रानाले जानकारी दिनुभयो । ति सबैले नेपाल सरकारले मान्यता दिएका औषधि बेच्नको लागि सञ्चालन अनुमति पाएका हुन् ।

तर अधिकांशले गर्भ बसिसकेपछि गर्भपतन गराउने औषधि अवैध रुपमा बिक्री गर्ने गरेका छन् । मेडिकलहरुले गर्भपतन गराउनको लागि महंगो मूल्यमा त्यस्तो औषधि बिक्री गर्ने गरेका छन् ।  मेडिकलहरुले बेच्ने गरेको यस्तो औषधि गर्भपतन किडका नामले चिनिने गरेको छ ।

अवैध रुपमा गर्भ रहेकाले महंगो मूल्य तिरेर औषधि किन्ने गरेका छन् । ज्यान नै जोखिममा पार्ने औषधि अनुमति बिना बेच्न नपाइने भएपनि सुदूरपश्चिमका अधिकांश औषधी पसलेले अवैध रुपमा त्यस्ता औषधि बेच्ने गरेका छन् ।

औषधि व्यवस्था विभागका महानिर्देशक बालकृष्ण खकुरेलले मिफेप्रिस्टोन र मिजोप्रिस्टोल भन्ने गर्भपतनका औषधि जथाभावी असुरक्षित ढंकले बिक्री भएको तथा नेपालमा अनुमति नपाएका एफटिपी किट, प्रेग्नो लगायतका गर्भपतनका औषधि बिक्री वितरण गरिँदा जनस्वास्थ्यमा गम्भीर असर परेको भन्दै केही समय अघि मात्र बिक्रीवितरण नगर्न सूचना प्रकाशित गरेको र सूचनाको अवज्ञा गर्नेलाई कारबाही गरिने जानकारी दिनुभयो ।