रेडक्रसद्वारा एच.आइ.भि. संक्रमितलाई झुल वितरण

प्यूठान ।   नेपाल रेडक्रस सोसाइटी प्युठान शाखाले आज एक कार्यक्रम गरी एच.आइ. भि. संक्रमित ५० जनालाई प्रति परिवारको १ का दरले सुपानेट झुल वितरण गरेको छ ।

जिल्ला स्वास्थ्य कार्यालय प्यूठानमा विभिन्न गाविसका संक्रमित व्यक्तिहरुलाई बोलाएर झुल वितरण गरिएको हो । सोही अवसरमा बोल्दै जिल्ला स्वास्थ्य प्रमुख डा. कृष्ण शाहले स्वास्थ्यको लागि सुपानेट झुलको प्रयोग गर्न सजिलो र फाइदाजनक भएको बताए ।

त्यस्तै सहायक प्रमुख जिल्ला अधिकारी तथा कार्यक्रमका प्रमुख अतिथि भुप बहादुर पुनले संक्रमित व्यक्तिहरुले आफुको आत्मबल नगिराई मैले ठिक छु, अरु व्यक्तिसरह काम गर्न सक्छु भन्ने सोंच लिएर समाजमा घुलमिल हुने र सकाराकात्मक कुराहरुलाई अंगाल्दै लैजानु पर्ने सुझव दिए । प्यूठान प्लसमा अध्यक्ष लक्ष्मी घिमिरेले अहिले समाजमा खुलेर काम गर्न सजिलो भएको अनुभव सुनाउंदै आफुहरु जस्ता व्यक्तिलाई समाजमा घुलमिल गराउने वातावरण सृजना गरेका संघ संस्थालाई धन्यवाद व्यक्ति गरिन् ।

जिल्लामा २००५ साल देखि अहिले सम्म १५० जना संक्रमित व्यक्ति पहिचान भएको र त्यस मध्ये १७ जनाको निधन भइसकेको नेपाल रेडक्रस जिल्ला शाखा प्यूठानका अध्यक्ष गुमानराज पुलामीले बताए ।