प्रधानमन्त्रीद्वारा प्रेस सेन्टरको महाधिवेशन उद्घाटन

काठमाडौं  ।   माओवादी केन्द्र निकट प्रेस सेन्टर नेपालको महाधिवेशन राजधानीको राष्ट्रिय सभागृहमा बिहिबारदेखि सुरु भएको छ ।

महाधिवेशनको उद्घाटन गर्दै प्रधानमन्त्री पुष्पकमल दाहाल प्रचण्डले अहिलेको प्राथमिकता संविधानलाई कार्यान्वय र सर्वस्वीकार्य बनाउनु हो भन्दै त्यसका लागि प्रेस सेन्टरले प्रभावकारी भूमिका खेल्नुपर्नेमा जोड दिए ।
विगतमा परिवर्तनको पक्षमा प्रेस सेन्टरले खेलको भूमिकाको प्रशंशा गर्दै प्रचण्डले आगामी दिनमा पनि सशक्त भूमिका निर्वाह गर्नुपर्नेमा जोड दिए ।
९५ सदस्यीय नयाँ कार्यसमिति तय गर्ने महाधिवेशनमा देशैभरबाट ६ सय प्रतिनिधि सहभागी छन् ।
महाधिवेशनबाट १ अध्यक्ष, १ वरिष्ठ उपाध्यक्ष, खुल्ला उपाध्यक्ष ३, समावेशी उपाध्यक्ष २, महासचिव १, १ उपमहासचिव र कोषध्यक्ष १ जना चयन हुनेछन् ।

सेन्टरले निर्विरोध कार्यसमिति चयन गर्ने दावी गरे पनि अध्यक्ष लगायतका सबै पदमा आकाक्षी बढी देखिएकाले महाधिवेशनमा ठुलै रस्साकस्सी हुने देखिएको छ ।
अध्यक्षको लागि ओम शर्मा, विष्णु सापकोटा, बलराम थापा, दीपक मैनाली, दिपेन्द्र रोकाया र सचिनज रोकाले दावी गरेका छन् ।
नेतृत्व सर्वसम्मत चयनको प्रयास भइरहेको भएपनि अहिलेसम्म कुरा मिल्न नसकेको बताइएको छ ।