एमाले अध्यक्ष ओली र भारतका राष्ट्रपति मुखर्जीबीच पौने ८ मा भेटवार्ता हुँदै

काठमाडौं । नेपाल भ्रमणका क्रममा रहेका भारतका राष्ट्रपति प्रणव मुखर्जी र एमाले अध्यक्ष केपीशर्मा ओलीबीच पौने ८ बजे भेटवार्ता हुँदैछ । बौद्धस्थित होटल हायतमा एमाले अध्यक्ष ओली र राष्ट्रपति मुखर्जीबीच औपचारिक भेटवार्ताका लागि समयतालिका निश्चित भएको ओलीका स्वकीय सचिव रमेश आर्चायले रातोपाटीलाई जानकारी दिए ।

यसअघि, काठमाडौंस्थित भारतीय दुतावासले आयोजना गरेको दिवाभोजमा सहभागी नभएका एमाले अध्यक्ष ओली साँझ होटल सोल्टीमा राष्ट्रपति बिद्यादेवी भण्डारीले आयोजना गरेको रात्रीभोजमा भने सहभागी भएका थिए । रात्रीभोजका अवसरमा राष्ट्रपति मुखर्जी र एमाले अध्यक्ष ओलीबीच अनौपचारिक कुराकानी नभएको स्वकीय सचिव आर्चायले बताए । होटल सोल्टीमा आयोजित रात्रीभोजमा एमाले अध्यक्ष ओली, वरिष्ठ नेता झलनाथ खनाल लगायतले सहभागिता जनाएका थिए ।

३ दिने नेपाल भ्रमणमा रहेका भारतका राष्ट्रपति प्रणव मुखर्जीले भ्रमणको दोश्रो दिन नेपालमा बिभिन्न राजनीतिक दलका नेताहरुसँगको भेटघाटमा ब्यस्त हँुदैछन् ।

उनले आजै विभिन्न दलका नेताहरुसँग छुट्टाछुट्टै भेटवार्ता गर्नेछन् भने मधेश केन्द्रीत दलका नेताहरुलाई सामुहिक भेटका लागि समय दिएका छन् । दलका नेताहरुसँगको भेटवार्तापछि होटल द्वारिकामा प्रधानमन्त्री पुष्पकमल दाहाल प्रचण्डले दिने रात्रीभोजमा सहभागी हुनेछन् ।