सरकारको बचाउमा काँग्रेस मन्त्री नआएकोमा प्रधानमन्त्री अचम्मित !

काठमाडौं । ‘सरकारका हरेक निर्णय र पहलमा प्रतिपक्षी एमालेको योजनाबद्ध हमला हुँदा पनि काँग्रेस मन्त्रीहरु मौन’ बसेकोमा प्रधानमन्त्री कार्यलय अचम्ममा परेको छ । प्रधानमन्त्रीका एक सल्लाहकारले काँग्रेसको यो मौनता ‘अनौठो’ रहेको बताए ।

अहिले सत्तारुढ माओवादी र एमाले कार्यकर्ताको सामाजिक संजालमा दोहोरी देखिने गरेको छ । तर, काँग्रेस मन्त्री, नेता र कार्यकर्ता यो बहसमा टाढै बसेका छन् ।

भारतीय राष्ट्रपतिको नेपाल भ्रमण हुँदा दिइएको विदा होस् वा अंगीकृतलाई राष्ट्र प्रमुख बनाउने गरि संविधान संसोधनको मस्यौदा तयार पारिएको दावीको समाचार होस्, एमाले र माओवादी केन्द्रका नेता–कार्यकर्ता बहसमा उत्रिए । तर, काँग्रेसका नेता–कार्यकर्ता यसमा सहभागी भएनन् ।

प्रधानमन्त्रीका ती सल्लाहकारले काँग्रेस मन्त्री मौन बस्नुका केही कारण हुन सक्ने बताए ।

–काँग्रेसका तर्फबाट सरकारमा मन्त्रीहरुवीच कुनै तालमेल छैन । सवैले व्यक्तिगत ढंगले काम गरेका छन् । सिंगो सरकारको बचाउ उनीहरुको प्राथामिकतामा नपरेको उनले बताए ।

–काँग्रेसका तर्फबाट सरकारको नेतृत्व उपप्रधानमन्त्री एव्म गृहमन्त्री विमलेन्द्र निधिले गरेका छन् । तर, काँग्रेस मन्त्री निधिको नियन्त्रणमा नदेखिएको ती सल्लाहकारको दावी छ ।

–काँग्रेसले संस्थापन, रामचन्दै पौडेल र कृष्णप्रसाद सिटौला अर्थात तीन गुटबाट आफ्ना मन्त्री सरकारमा पठाएको थियो । सरकारमा सहभागी मन्त्रीहरु आ–आफ्ना गुटमा रमाईरहेको ती सल्लाहकारले बताए ।

–काँग्रेसका मन्त्रीहरुमा सरकार सफल वा असफल जे भएपनि यसको भागीदार प्रधानमन्त्री प्रचण्ड हुन्छन् । त्यसकारण प्रचण्ड सफल हुनैपर्छ भन्ने काँग्रेस मन्त्रीहरुलाई नलागेको हुन सक्छ । त्यसकारण उनीहरु सरकारको बचाउमा नआएका हुन सक्ने ती सल्लाहकारको बुझाई छ ।

प्रधानमन्त्री प्रचण्ड यतिबेला आफ्नै पार्टीका कार्यकर्ता, विपक्षी, मिडिया र सामाजिक संजालबाट धेराबन्दीमा परेका छन् । तर, उनको बचाउँमा संस्थागत रुपमा कुनै समूह परिचालन नभएको माओवादीका केही नेताहरु बताउँछन् ।

काँग्रेस नेता रिजाल भन्छन्,

काँग्रेस नेता मिनेन्द्र रिजाल सरकार प्रधानमन्त्री संविधान कार्यन्वयनमा लागे जस्तो नदेखिएको बताउँछन् । ‘मुख्य कुरा संविधान कार्यान्वयनमामा लाग्ने हो । तर अहिले प्रधानमन्त्री त्यो दिशामा लागेजस्तोे मलाई लागेको छैन ।’ उनले भने । उनले अहिलेसम्म अहिलेसम्म शान्ति सम्झौताका बाँकी कामहरु हुन नसकेको बताए ।

रिजालले भारतसँगको सम्बन्धमा सरकारले सुधारको पहल गरेको बताए । ‘नेपालको रााष्ट्रपतिको निमन्त्रणामा भारतीय राष्ट्रपतिको भ्रमण भएको छ । यो चिसिएको सम्बन्धमा सुधार हो । सम्बन्ध सबै सुध्रिसक्यो भन्ने होइन । सम्बन्ध सुधाकारको बाटो खुलेको छ ।’ उनले भने ।