सगरमाथा क्षेत्र भ्रमण गर्ने पर्यटकको संख्या बढ्यो

जेपी थुलुङ, सोलुखुम्बु । सगरमाथा क्षेत्र भ्रमण गर्ने पर्यटकको संख्या बढेको छ । गत वर्षको तुलनामा यस वर्ष सगरमाथा क्षेत्र भ्रमण गर्ने पर्यटकको संख्यामा उल्लेख्य बृद्धि भएको हो । अंग्रेजी महिना अक्टोबरको तथ्याङ्क अनुसार गत वर्षको तुलनामा ३ हजार ८९० जनाले बृद्धि भएको हो । यो संख्या गत वर्षको अक्टोभर महिनामा आएको पर्यकटको दोब्बर भन्दा बढि हो ।

सन् २०१५ को अक्टोबर महिनामा २ हजार २५२ जना पर्यटकले मात्र सगरमाथा क्षेत्र प्रवेश गरेकोमा यस वर्षको अक्टोबर महिनामा ६ हजार ४४२ जना पर्यटकले सगरमाथाको प्रवेशद्धार नाम्चे हुदै खुम्बु क्षेत्र प्रवेश गरेको ईलाका प्रहरी कार्यालय नाम्चे जनाएको छ । अहिले पर्यटकको लागि मुख्य सिजन भएकोले पर्यटकहरुको आगमन गत वर्षको तुलनामा धेरै राम्रो भएकोले पर्यटक प्रहरीलाई भ्याईनभ्याई भएको पर्यटक प्रहरी कार्यालय लुक्लाले जनाएको छ ।

गत वर्ष भुकम्प, नाकाबन्दी जस्ता विभिन्न कारणले पर्यटकीय सिजनमा खुम्बुमा पर्यटकको आगमन नहुदा व्यवशायीलाई मार परेको भएपनि यसवर्षको पर्यटकको संख्याले व्यवशायीहरु खुशी भएका छन् । नाम्चेका होटल व्यवशायी लामाकाजी शेर्पाका अनुसार पर्यटकको संख्या थप बृद्धि गर्नको लागि सबै लाग्नु पर्न आवश्यक रहेको छ । पर्यटकको संख्या प्रत्येक वर्ष कहिले बढ्ने कहिले घट्ने जस्ता समस्याले व्यवशायीलाई मार परेको हुदा सम्बन्धित निकायले चासो दिन सकेमा पर्यटक बढ्ने उहाको भनाई छ ।

यस वर्षको पर्यटकको संख्यामा आएको सुधारले गत वर्षको नोक्सान असुल्ने भन्दै व्यवशायीहरु खुशी भएका हुन् । गत वर्ष पर्यटक न्यसन हुदा भाडा व्यवशाय गरेका व्यवशायीलाई भाडा तिर्न नसक्दा समस्या भएको थियो । दिङबोचेका व्यवशायी पृथु राई भन्नुहुन्छ‘गत वर्ष ऋण काढेर घरभाडा तिरियो, यसवर्ष राम्रो छ ।’