झाडापखालाबाट एकको मृत्यु, ३४ जना बिरामी

सिरहा। सिरहाको औरहीमा सोमबारदेखि फैलिएको झाडापखालाको प्रकोपले एक बालकको ज्यान गएको छ । ३४ जना बिमारी परेका छन् ।

झाडापखालाका कारण औरही–३ का ७ वर्षे वर्जुन यादवको ज्यान गएको हो । उनको जिल्ला अस्पताल सिरहामा उपचारको क्रममा ज्यान गएको हो ।  झाडापखाला औरही गाविसको २, ३, ५ र ८ वडामा फैलिएको छ । झाडापखाला फैलिएपछि स्थानीयबासिन्दा त्रसित छन् । जिल्ला जनस्वास्थ्य कार्यालयले भने हैजा नभएको भन्दै सामान्य झाडापखाला भएकोले नआत्तिन सबैलाई अनुरोध गरेको छ ।

झाडापखाला बिमारी सबैको स्थानीय प्राथमिक स्वास्थ्य केन्द्रमा उपचार भइरहेको छ । प्राथमिक स्वास्थ्य केन्द्रमा बिरामीको चाप बढेपछि बिरामीलाई भूँइमै राखेर उपचार गरिएको छ । पेट दुख्ने, बान्ता आउने र पखाला लाग्ने लक्षण देखिएको प्राथमिक स्वास्थ्य केन्द्रका निमित्त प्रमुख रामनारायण सिंहले बताउनुभयो । झाडापखालाबाट बालबालिका सबैभन्दा धेरै प्रभावित छन् ।

झाडापखाला नियन्त्रणका लागि इपिडिमियोलोजी तथा रोग नियन्त्रण महाशाखा, काठमाडौं र जिल्ला स्वास्थ्य कार्यालयको टोली गाउँमै पुगेर उपचार गरिरहेको जिल्ला जनस्वास्थ्य प्रमुख दया शंकरलाल कर्णले जानकारी दिनुभयो ।