वैद्य माओवादीले मङ्सिर १० गते देशव्यापी रूपमा विरोध प्रदर्शन गर्ने

काठमाडौँ । नेकपा क्रान्तिकारी माओवादीले राष्ट्रियता, जनतन्त्र र जनजीविकाको सवालमा गम्भिर हुन सरकारलाइ आग्रह गरेको छ ।

नेकपा क्रान्तिकारी माओवादीले आज एक प्रेस वक्तव्य जारी गर्दै दश वर्षे जनयुद्ध र विविध आन्दोलनका दौरान अगाडि सारिएका महिला, दलित, आदिवासी मधेसी, मुस्लिम, पिछडिएको क्षेत्रसहित उत्पीडित वर्ग र समुदायका आधारभूत समस्याको समाधान राज्य पुनःसंरचनासहितको संविधान संशोधनद्वारा होइन, वर्तमान संविधानको खारेजी र सङ्घीय जनगणतान्त्रिक संविधानको निर्माणबाट मात्रै हुने बताएको हो ।

कार्तिक २४ र २५ गते काठमाडौँमा बसेको पार्टी सचिवालयका निर्णयहरु सार्वजनिक गरिएको विज्ञप्तीमा राष्ट्रको आन्तरिक मामिलामा अहस्तक्षेपको मान्यता र एक चीन नीतिप्रति पार्टी दृढ रहेको कुरा उल्लेख गरिएको छ ।

नेकपा क्रान्तिकारी माओवादीका अध्यक्ष मोहन बैद्य किरणद्धारा आज हस्ताक्षरित विज्ञप्तीमा भनिएको छ —

– नेपालको असंलग्न परराष्ट्र नीति र पञ्चशीलका मान्यता तथा मापदण्डविरुद्ध कतिपय गम्भीर प्रकृतिका गतिविधि हुँदै आएकोमा पार्टीको विशेष ध्यानाकर्षण भएको छ । एक अर्काे मुलुकको सार्वभौमिकता, राष्ट्रिय स्वाधीनता र आन्तरिक मामिलामा अहस्तक्षेपको मान्यता र एक चीन नीतिप्रति पार्टी दृढ रहेको कुरा पुनः सार्वजनिक गरिएको छ ।

– राष्ट्रियता, जनतन्त्र र जनजीविकाका समस्या गम्भीर बन्दै गइरहेको वर्तमान स्थितिमा राज्य पुनःसंरचना, संविधान संशोधन लगायतका विषयलाई सरकारले आफ्नो कार्यसूचीको प्रमुख विषय बनाउँदै आएको छ । विभिन्न ऐतिहासिक जनआन्दोलन र दश वर्षको महान् जनयुद्धको प्रक्रियामा उठाइएका मजदुर, किसान, महिला, दलित, आदिवासी जनजाति, मधेसी, मुस्लिम, पिछडिएको क्षेत्रसहित उत्पीडित वर्ग र जनसमुदायका राष्ट्रियता, जनतन्त्र र जनजीविकाका आधारभूत समस्याको समाधान यसप्रकारको राज्य पुनःसंरचनासहितको संविधान संशोधनद्वारा होइन, वर्तमान संविधानको खारेजी र सङ्घीय जनगणतान्त्रिक संविधानको निर्माणबाट मात्रै हुने नीतिप्रति पार्टी दृढ रहिआएको छ ।

तसर्थ, बैठकमा मुख्यतः दलाल तथा नोकरशाही पुँजीपति एवम् सामन्त वर्गका हकहितको प्रतिनिधित्व गर्ने वर्तमान संविधानको खारेजी र सङ्घीय जनगणतान्त्रिक संविधान निर्माणका लागि जनआन्दोलनलाई नयाँ ढङ्गले सङ्गठित गर्ने र उक्त विषयसित सम्बन्धित कुनै पनि बँुदासित सहमत हुने राजनीतिक शक्तिसित कार्यगत एकता गरी अगाडि बढ्ने निर्णय लिइएको छ ।

– राष्ट्रियता, जनतन्त्र र जनजीविका लगायतका विषयलाई लिएर यही मङ्सिर १० गते देशव्यापी रूपमा विरोध प्रदर्शन गर्ने निर्णय लिइएको छ । साथै, उक्त विषयबारे राज्य तथा जिल्लाद्वारा आफ्नो सापेक्षतामा सङ्घर्षका कार्यक्रम दिने ठेगान भएको छ ।

– विभिन्न घटकहरूमा छरिएर रहेका क्रान्तिकारी कम्युनिस्टहरूलाई एकताबद्ध तुल्याउन, नयाँ ढङ्गले क्रान्तिकारी कम्युनिस्ट पार्टीको निर्माण गर्न र ध्रुवीकरणको प्रक्रियालाई गति दिनका लागि आवश्यक पहल गर्ने निर्णय लिइएको छ ।