गृहमन्त्री भेट्न निवासमै पुगे प्रहरी प्रमुख

काठमाडौं ।   प्रहरी महानिरीक्षक उपेन्द्रकान्त अर्याल गृहमन्त्री विमलेन्द्र निधिलाई भेट्न उनको सरकारी निवास पुल्चोक पुगेका छन् । शनिवार मध्यान्ह गृहमन्त्रीको हतारोका बीच करिब ७ मिनेट पुल्चोकमा भेटघाट भएको गृहमन्त्रीका स्वकिए सचिव विश्वास कर्णले जानकारी दिए ।

‘मन्त्रीज्यु तरुणदलको अधिवेशन उद्घाटन समारोहमा सहभागी हुन पोखरा जाने हतारोमा हुनुहुन्थ्यो’ कर्णले भने, ‘त्यहि बीचमा उहाँहरु बीच करिब ७ मिनेट भेटघाट भयो ।’

इन्डोनेशियाको बालिमा भएको अन्तर्राष्ट्रिय प्रहरी संगठन (इन्टरपोलको) ८५ औं महासभामा सहभागी भएर अर्याल शुक्रवार साँझ स्वदेश फर्किएका थिए ।
पछिल्लो समय गृहमन्त्रीसँगको सम्बन्धमा आएको चिसोपनसँगै प्रहरी प्रमुखलाई हटाउने तयारीमा बर्तमान सरकार लागीपरेको चर्चाका बीच भएको शनिवारको भेटलाई अर्थपुर्ण रुपमा हेरिएको गृहमन्त्रालयका एक उच्च अधिकारीले बताए ।