गोविन्द केसीको अनसन सुरु

काठमाडाैँ  । त्रिभुवन विश्वविद्यालय शिक्षण अस्पतालका प्राध्यापक डा. गोविन्द केसी अनसन सुरु गरेका छन् ।

सरकारले विगतमा आफूसँग गरेको सहमति विपरीत वरिष्ठता मिचेर चिकित्सा शास्त्र अध्ययन संस्थान (आइओएम)को डीनमा डाक्टर केपी सिंहलाई नियुक्त गरेको भन्दै डा. केसीले अनसन शुरु गर्नुभएको हो ।

आइतबार अपरान्ह चार बजे शिक्षण अस्पताल महाराजगञ्ज परिषरमा अनसन शुरु गर्नुअघि पत्रकार सम्मेलन गरी प्राध्यापक डा. केसीले जनप्रतिनिधिले जनताको पक्षमा भन्दा आफ्नो स्वार्थमा काम गरेकाले मुलुक दलालको चंगुलमा फस्दै गएको आरोप लगाए । उनले माफियाहरुको चंगुलमा फसेर नेताहरुले जनताको हित विपरीत काम गरेको टिप्पणी गरे । डा. केसीले जनताले राज्यबाट पाउनुपर्ने सुविधा जनप्रतिनिधिले नै लुटेर खाएको आरोप समेत लगाए ।

आइओएममा राजनीतिक भागबण्डामा नभई योग्यताका आधारमा नियुक्त गर्नुपर्छ भन्ने आफूले पटक पटक आवाज उठाएपनि विश्वविद्यालयले अटेर गरेको डाक्टर केसीको दाबी थियो । एक वर्षदेखि डीन र चार जना सहायक डीनको पद रिक्त नै राखेर त्रिविका पदाधिकारीले शैक्षिक अपराध गरेको डा. केसीले आरोप लगाए ।

डाक्टर केसीले विश्वविद्यालयहरु राजनीतिक भागवण्डामा चलेकाले कार्यकर्ता उत्पादन गर्ने थलोको रुपमा विकसित भएको आरोप समेत लगाए । उनले आफूले चार वर्षअघि अनसन शुरु गरेपछि केही सुधार आएपनि फेरि दलहरुले अस्पताल र शिक्षण अस्पताललाई विकृत बनाएको आरोप लगाए ।

सिफारिस समितिले आईओएमको डिनमा पहिलो नम्बरमा डा जगदिश अग्रवाल, दोस्रो नम्बरमा डा. केपी सिंह र तेस्रो नम्बरमा डा. ज्योती शर्माको नाम प्रस्ताव गरेको थियो । डा. केसीको यो १० औं पटकको अनसन हो । अनसनसँगै डा. केसीले अख्तियार दुरुपयोग अनुसन्धान आयोगका प्रमुख आयुक्त लोकमान सिंह कार्कीमाथी लगाईएको महाअभियोलाई निष्कर्षममा पुर्याउन, त्रिवि उपकुलपति तीर्थ खनियालाई बर्खास्त, चिकित्सा शिक्षामा निर्धारण गरे अनुरुपको शुल्क कायम, आईओएमलाई पुर्ण स्वायक्तता संस्था बनाउनुपर्ने लगायत विभिन्न ९ बुँदे माग अघि सारेका छन् ।