पाँचथरको सराङडाँडा घरभित्रको धुवाँमुक्त गाविस घोषणा

पाँचथर  । पाँचथरको सराङडाँडा गाविसलाई घरभित्रको धुवाँमुक्त गाविस घोषणा गरिएको छ । गाविसमा रहेका एक हजार २८४ घरधुरीमध्ये शतप्रतिशतले सुधारिएको चुलो निर्माण गरेसँगै मङ्गलबार आयोजित एक कार्यक्रमकाबीच धुवाँमुक्त गाविस घोषणा गरिएको हो ।

उक्त कार्यक्रममा सोही दिनदेखि नै सुधारिएको चुलोको प्रयोग गर्ने घोषणा समेत गरिएको थियो । घोषणा कार्यक्रममा बोल्दै जिविसको वातावरण, ऊर्जा तथा जलवायु परिवर्तन शाखा प्रमुख दिनेशकुमार सिंहले सुधारिएको चुलोबाट हुने फाइदाका बारेमा बोलेका थिए ।

यस्तै नेपाली काँग्रेस जिल्ला सचिव रुपनारायण जवेगु, नेकपा एमालेका जिल्ला सहसचिव धनकुमार फियाक, राप्रपा नेपालका जिल्ला अध्यक्ष घलेन्द्र कुरुम्बाङ, नेकपा माओवादी केन्द्रका जिल्ला सदस्य ढकेन्द्र भट्टराई, स्थानीय स्वास्थ्य सहयोग समिति संयोजक नरेन्द्र बस्नेत, महिला विकास अधिकृत निर्मला मिश्रलगायतले वातावरण र जनस्वास्थ्यका बारेमा प्रकाश पारेका थिए ।

सन् २०१६ भित्रमा पाँचथरलाई घरभित्रको धुवाँमुक्त जिल्ला घोषणा गर्ने लक्ष्य राखिए पनि अपेक्षा गरेअनुरुपको काम हुन नसक्दा १२ वटा गाविसमात्रै धुवाँमुक्त गाविस घोषणा भएका छन् । अझै २६ वटा गाविस र एक नगरपालिका घोषणा हुन बाँकी रहेको वातावरण, ऊर्जा तथा जलवायु परिवर्तन शाखाले जनाएको छ ।