मतदाता नामावलीमा एक लाख १६ हजार नाम दर्ता

रोल्पा । जिल्ला निर्वाचन कार्यालय रोल्पाको मतदाता नामावलीमा हालसम्म एक लाख १६ हजार ५३१ जनाले आफ्नो नाम दर्ता गराइसकेका छन् ।

विगतका वर्षदेखि २०७१/७२ असार मसान्तसम्म महिला ५६ हजार ९४७ र पुरुष ५१ हजार ३२४ गरी जम्मा एक लाख ८ हजार २७१ जनाले मतदाता नामावलीमा आफ्नो नाम समावेश गराएको तथ्याङ्कमा उल्लेख छ ।

यसैगरी आव २०७२/७३ को असार मसान्तसम्म महिला दुई हजार ६५६ जना र पुरुष चार हजार १०४ जना गरी छ हजार ७६० जनाले आफ्नो नाम दर्ता गराइसकेका छन् ।

यस्तै आव २०७३/७४ को पहिलो चौमासिकमा महिला पुरुष दुवै गरी करिब एक हजार ५०० जनाले मतदाता नामावलीमा आफ्नो नाम समावेश गराएका छन् । यसरी जिल्लामा हालसम्म मतदाता नामावलीमा आफ्नो नाम समावेश गराउनेको सङ्ख्या एक लाख १६ हजार ५३१ पुगेको जिल्ला निर्वाचन कार्यालय रोल्पाका नायब सुब्बा मानबहादुर कुँवरले जानकारी दिए ।

उहाँका अनुसार मतदाताको सहजताका लागि जिल्ला प्रशासन कार्यालय रोल्पामा डेस्क खडा गरी नामावली दर्ता गर्ने काम भइरहेको छ ।

विसं २०६८ को जनगणनाअनुसार जिल्लाको कुल जनसङ्ख्या दुई लाख २१ हजार १७७ रहेको छ ।