झापामा सवारीसाधनको ठक्करबाट मोटरसाइकल चालकको मृत्यु

झापा । नम्बर नखुलेको सवारीसाधनको ठक्करबाट गएराति झापाको दमकमा एक मोटरसाइकल चालकको मृत्यु भएको छ ।

दमक–१० स्थित पूर्व पश्चिम राजमार्गको सगरमाथा पेट्रोल पम्पअगाडि नम्बर नखुलेको गाडीले ठक्कर दिँदा मोटरसाइकल चालक मोरङ उर्लाबारी–६ का ३५ वर्षीय राजन कुइँकेलको दुर्घटनामा परी मृत्यु भएको इलाका प्रहरी कार्यालय, दमकले जनाएको छ ।

दमकबाट घर फर्कँदै गरेको अवस्थामा मे ८ प ११९३ नंको मोटरसाइकललाई विपरीत दिशाबाट आएको नम्बर नखुलेको सवारीसाधनले गएराति साढे ९ बजेतिर ठक्कर दिँदा दुर्घटना भएको थियो ।

दुर्घटनामा गम्भीर घाइते भएका उनको उपचारका लागि अस्पतालतिर लैजानेक्रममा बाटोमै मृत्यु भएको प्रहरीले जनाएको छ । ठक्कर दिने सवारीसाधनको खोजी भइरहेको इलाका प्रहरी कार्यालय दमकका प्रहरी नायब उपरीक्षक राजन लिम्बूले जानकारी दिए।