खानेपानीका लागि पाँच महिना सकस

गुल्मीको पौदीअमराई–३ बाङ्गेका उपभोक्ता वर्षको पाँच महिना खानेपानी लिनका लागि घर नजिकै रहेका कुवा, कुलेसामा गई घन्टौ‌ं लगाएर खानेपानी लिन धाउनुपर्ने बाध्यता रहेको छ ।

करिब २२ वर्षअगाडि गुल्मी अर्घाखाँची ग्रामीण विकास परियोजना (गाडेप)मार्फत गाविस–३ बाङ्गेमा खानेपानी आयोजना सञ्चालन गरेको थियो । तत्कालीन समयमा सञ्चालित खानेपानीे आजभोलि समय–समयमा उचित मर्मतसम्भार हुन नसक्दा अधिकांश पाइप धेरै पुरानो र जीर्ण हुँदै गएपछि बीच–बीचका जडान टुटफुट भइरहने हुँदा खानेपानी नियमित सञ्चालन हुन नसकेको खानेपानी मर्मतका कर्मचारी कृष्णबहादुर हमालले जानकारी दिए ।

विगत केही वर्षयता वर्षभरिमा झन्डै साउनदेखि माघ महिनासम्म जेनतेन खानेपानी आउने र अन्य महिना भने खानेपानी ठप्प हुने हुँदा स्थानीयवासी नजिकैका भत्किसकेका कुवा कुलेसामा घन्टौं धाएर एक ग्रागी पानी भर्न लामो समय लगाएर खानेपानी ल्याउनुपर्ने बाध्यता रहेको समाजसेवी श्यामन्त नेपालीले जानकारी दिए ।

खानेपानीबाट वडा नं ३ का तीनसय २० घरधुरीका उपभोक्ता बढी समस्यामा रहेका छन् । धारामा खानेपानी नआउँदा बढी मात्रामा स्कुल पढ्ने साना–साना बालबालिका समस्यामा परेका छन् ।

पानी धारामा नआउँदा घरमै बसेर टाढाटाढा पानी ल्याउन जानु पर्ने र समयमा स्कुल जान नसक्नु, स्कुल गएपनि बिहान–बेलुकी घरमा पानी बोक्नुपर्ने बाध्यताले बालबालिकाको पढाइसमेत थप प्रभावित हुने गरेको छ ।