एक बर्षमा पुनर्निमाण प्राधिकरणले कति काम गर्यो ?

काठमाडौं । भूकम्पपछिको पुनर्निमार्णका लागि गठित राष्ट्रिय पुर्ननिमार्ण प्राधिकरणले काम थालेको एक बर्ष पूरा भएको छ । एक बर्षमा प्राधिकरणले गरेका कामबारे आइतबार पत्रकार सम्मेलन गरेर जानकारी दिइएको छ ।
प्राधिकरणका कार्यकारी निर्देशक शुसिल ज्ञवाली, सचिव डा.सञ्जय शर्मा, सह–सचिव धर्मराज गुराँगाईलगायतका कार्यकारी समितिका पदाधिकारीसहितको टोलीले प्राधिकरणले गरेका कामबारे जानकारी गराएको हो ।
६ लाख २६ हजार ३६ घरधनी अनुदान पाउन सुचिकृत
–राष्ट्रिय पुनर्निमार्ण प्राधिकरणले व्यक्तिका निजी आवास निमार्णका लागि विशेष प्राथमिता दिएको बताएको छ । भूकम्पको मारमा परेका भूकम्प अति प्रभावित १४ जिल्लाका ६ लाख २६ हजार ३६ घरधनीसँग अनुदान रकम दिन सूचीकृत गरेको जनाएको छ ।
–प्राधिकरणका अनुसार पुस ८ गतेसम्म ५ लाख ४३ हजार १ सय ७ घरधनीले अनुदान सम्झौता गरेका छन् भने ४ लाख ५८ हजार ५ सय ९२ घरधनीले अनुदान रकम प्राप्त गरी घर पुनर्निर्माण गर्ने वातावरण तयार भएको छ ।
–भूकम्प अतिप्रभावित १४ जिल्लापछि भूकम्पबाट प्रभावित र कम प्रभावित १७ जिल्लामा सर्वेक्षणको काम अघि बढाउने प्रक्रिया शुरु गरेको छ ।
–भूकम्प प्रभावित क्षेत्रमा ४१ हजार ३ सय ११ घर निर्माण भएको र १७ हजार १ सय ४४ घरको पुनर्निर्माण जारी रहेको प्राधिकरणका प्रमुख ज्ञवालीले जानकारी दिए ।
गुनासोको चाङ
–भूकम्पप्रभावितलाई राहत वितरणका लागि घरधुरी सर्वेक्षण, अनुदान सम्झौता र वितरणका क्रममा २ लाख ४ हजार १ सय ७७ वटा गुनासा स्थानीय तहमा दर्ता भएको प्राधिकरणले जनाएको छ ।
–प्राधिकरणको केन्द्रमा मात्रै १ लाख ७ हजार गुनासा प्राप्त भएका छन् ।
–कतिपय गुनासाहरु स्थानीय तहबाटै सम्बोधन भएका छन् भने केन्द्रमा प्राप्त मध्ये पनि ७९ हजार ३ सय २२ वटा गुनासाहरुको पुनरावलोकन भएको छ ।
–गुनासो पछ्र्यौट पछि गुनासो कर्तालाई नयाँ अनुदान कार्यविधि पारित हुनासाथ प्रकाशन गरिने दिइने भएको छ ।

६९ वटा पुरातात्विक सम्पदाको पुनर्निर्माण कार्य जारी
–प्राधिकरणले देशभर क्षति भएका झन्डै ७ सय धार्मिक–साास्कृति पुरातात्विक सम्पदाहरु मध्ये १५ वटा सम्पदाको पुननिर्माण कार्य सम्पन्न भएको जनाएको छ ।
–भूकम्प प्रभावित स्थलमा ६९ वटा सम्पदाको पुनर्निर्माण कार्य चलिरहेको छ ।
–चालू आर्थिक वर्ष २०७३÷०७४ भित्रै थप ७४ वटा सम्पदाको निर्माण कार्य सम्पन्न गर्ने लक्ष्य लिएको प्राधिकरणले जनाएको छ ।
स्थानीय तहको पुर्नसंरचना भएपछि मात्र अस्पताल बन्ने
प्राधिकरणका कार्यकारी निर्देशक शुसिल ज्ञवालीले स्थानीय तहको पुर्नसंरचना पछि बन्ने केन्द्रका आधारमा अस्पातलाई स्थायी ढंगले पुनर्निमार्ण गर्ने बताएका छन् ।
–हालसम्म २ सय वटा स्वास्थ्य केन्द्रको प्रिफेब्रिकेटेड संरचनामा पुनर्निर्माण सम्पन्न भएको र १ सय ६९ वटा स्वास्थ्य केन्दको पुनर्निर्माण कार्य जारी रहेको प्राधकिरणले जनाएको छ ।
–चालू आर्थिक वर्षभित्रै २ सय ६८ वटा स्वास्थ्य केन्द्र तथा संस्थाको पुनर्निर्माण कार्य सम्पन्न गर्ने लक्ष्य लिएको छ ।
२ सय २८ वटा सरकारी भवन पुनर्निर्माणको चरणमा
–प्राधिकरणले ३२ वटा सरकारी भवनको प्रिफेब्रिकेटेड संरचनामा पुनर्निर्माण सम्पन्न भएको जनाएको छ ।
–यस्तै २सय २८ वटा सरकारी भवन पुनर्निर्माणको चरणमा रहेको जनाइएको छ ।
–चालू आर्थिक वर्षभित्रै केन्द्र र जिल्ला तहका स्थायी एवम् प्रिफ्रेब्रिकेटेड गरी ५ यस ७ वटा भवन पुनर्निर्माण गर्र्ने लक्ष्य राखेको छ ।
२ सय बिद्यालय पुनर्निमार्ण
–प्राधिकरणले शैक्षिक संस्थातर्फ २ सय विद्यालयको पुनर्निर्माण भएको बताएको छ ।
–१२ सय विद्यालय भने पुनर्निर्माणको प्रक्रियामा छन् ।
–२०७४ साल कार्तिकभित्र २३ सय विद्यालयहरुको मर्मत सम्भार एवम् पुनर्निर्माण कार्य सम्पन्न गर्ने लक्ष्य लिएको प्राधिकरणले जनाएको छ ।

–यस्तै भूकम्पबाट क्षति भएका खानेपानी आयोजना मध्ये २ सय ९७ वटाको पुनर्निर्माण कार्य सम्पन्न भइसकेको र ९६१ आयोजनाहरुको पुनर्निर्माण भइरहेको कार्यकारी निर्देशक ज्ञवालीले जानकारी दिए ।
यो बर्ष कम्तीमा २५ बस्ति बनाउने
–प्राधिकरणले ‘अझ राम्रो र बलियो बनाऔं’ भन्ने अवधारणामा आधारित रहेर यो बर्ष कम्तिमा २५ वटा एकीकृत सघन बस्तीहरुको योजना तयारी गर्ने गरी कार्य अघि बढाइएको बताएको छ ।
–काठमाडौं उपत्यकाभित्रका सात वटै विश्वसम्पदा क्षेत्रहरु र गोरखा एवं नुवाकोट दरबार क्षेत्रको वृहत्तर विकासका निम्ति गुरुयोजना तयारी कार्य अघि बढाइएको जानकारी दिएको छ ।
–अन्तर्राष्ट्रिय दातृ निकाय र विशेषज्ञहरुले प्राधिकरण गठन भएदेखि एक वर्षको अवधिको कामलाई सन्तोषजनक रुपमा अघि बढेको भन्दै थप सहयोगको प्रतिबद्धता समेत व्यक्त गरेको कार्यकारी निर्देशक ज्ञवालीले जानकारी दिए ।