पाँच महिनामा ४ खर्बको आयात

काठमाडौं । पछिल्लो पाँच महिनामा ३ खर्ब ८२ अर्ब २७ करोड ५९ लाख रुपैयाँको वस्तु आयात भएको छ । यस अवधिमा भएको आयात गत बर्षको यसै अवधिको तुलनामा ७८.२६ प्रतिशतले बढी हो । तर, यो अवधिमा वस्तु निर्यात ३० अर्ब ६० करोड ५७ लाख रुपैयाँको भएको छ ।

निर्यात भने गत बर्षको मंसिरको तुलनामा १४.०९ प्रतिशतले बढी हो । गत बर्ष भारतीय सीमा नाकाहरुमा अवरोधका कारण आयात प्रभावित भएको खबर आजको कारोबार दैनिकमा छ ।

चालू बर्षमा स्थिति सहज हुदा मंसिरसम्म व्यापारघाटामा झनै ठूलो खाडल देखिएको छ । आयात उच्च अंकले बढेको र निर्यातमा खासै सुधार नहुँदा व्यापारघाटा झन्डै दोब्बरले बढेको छ ।

मंसिरसम्म व्यापारघाटा ८७.४४ प्रतिशतले बढेको छ । भन्सार विधागद्वारा सार्वजनिक मंसिरसम्मको तथ्यांकअनुसार यस अवधिमा कुल वैदेशिक व्यापार भने ७१.१३ प्रतिशतले वृद्धि भएको छ ।

गत बर्ष मंसिरसम्म २ खर्ब ४१ अर्बको वस्तु आयात निर्यात भएकोमा चालू अवधिमा ४ खर्ब १२ अर्ब रुपैयाँ पुगेको छ । निर्यात सुस्त र आयात बढेपछि आयात निर्यात अनुपात पनि बढेको छ ।