छ सय परिवारलाई कम्बल वितरण

सप्तरी ।  सप्तरीको तिलाठी र कोचाबखारी गाविसका विपन्न परिवारलाई युथ नेपालले कम्बल वितरण गरेको छ ।

उक्त संस्थाले छुटाछुटै कार्यक्रम गरी दुवै गाविसका करिब छ सय विपन्न तथा गरिब परिवारलाई एक/एक थान कम्बल वितरण गरिएको युथ नेपालका मोहन यादवले जानकारी दिए। उनीहरुलाई जिल्ला प्रहरी कार्यालयका प्रहरी उपरीक्षक दिवेश लोहनीले कम्बल बाँडेका हुन् ।

यस्तै सप्तरीको हनुमाननगर योगिनिमाई नगरपालिकाको इनर्वामा समेत विपन्न र गरिब परिवारलाई जाडोबाट बच्नका लागि ‘नेपाल सेयरको सहयोग र क्रिएसेन नेपाल’को समन्वयमा सप्तरी युथ नेपालले एक सय १५ जनालाई एक थानका दरले कम्बल वितरण गरेको थियो ।

यसैगरी सप्तरीको कोइलाडी गाविसमा यहाँ एक दिने निःशुल्क स्वास्थ्य शिविर पनि सञ्चालन गरिएको छ ।

स्थानीय निम्न माध्यमिक विद्यालयमा तपेश्वरी समाज र हुर्क नेपालको आयोजना तथा ‘द फ्रिड्म फन्ड’को सहयोगमा आरके चिल्डेन अस्पताल विराटनगरले एक दिने निःशुल्क स्वास्थ्य शिविरको आयोजना गरेको संस्थाका अध्यक्ष पार्थो सरकारले बताए ।