छाउपडी प्रथाबिरुद्ध अभियान चलाउँदै महिलाहरु

कालिकोट  । कालिकोट जिल्लाको नानीकोटका महिलाहरु पछिल्लो समय छाउपडी प्रथा बिरुद्ध जागरुक हुन थालका छन् ।
विगतको समयमा आफै महिनावारी हुँदा घर भन्दा टाढाको ओडारमा, गोठमा बस्ने यहाँका महिलाहरु केही समय यता महिनावारी हुँदा घरभित्रै बस्न र बसाल्न थालेका छन् । महिनावारी प्राकृतक रुपमा हुने भएपनि सामाजिक कुरीतिहरुका कारण यसलाई अछुत भन्ने चलन चलाएका कारण महिलाहरुले बिभिन्न खालका पीडाहरु खेप्नु परेको भन्दै अहिले यसैको बिरुद्ध अभियान थालिएको नानीकोट गाविस वडा नं. ७ निवासी महिला स्थास्थ्य स्वयमसेविका नन्दादेवी संज्यालले बताइन् ।

उनले नानीकोट गाविसमा बिगत लामो समयदेखी जरा गाडेको छाउपडी प्रथा न्यूनिकरणका लागि नमरमिता महिला संजालका साथै प्रत्यक वडामा रहेका महिला स्वास्थ्य स्वयमसेविकाले अभियान संचालन गरिरहेको बताउदै जसका कारण नानीकोट गाविसको वडा नं. ७ बाहुनहरुको गाउँलाई छाउपडी प्रथा मुक्त वडा घोषणा गरिएको बताइन् ।
नमरमिता महिला संज्याल नानीकोटका अध्यक्ष अन्जना संज्यालले स्थानिय महिलाहरुको सक्रियतामा गाँउमा सबै महिलाहरुले महिनावारी हुँदा घरभित्रै बस्ने, दुध दही महि खाने र मन्दीर परीसरमा पनि सहज रुपमा जाने, छाउपडी गोठहरु भत्काउने गरेका कारण त्यो गाउलाई एक औपचारीक कार्यक्रमको आयोजना गरी छाउपडी मुक्त समुदाय घोषणा गरिएको बताइन् ।
नमरमिता महिला संजालको आयोजना तथा गाविसको समन्वयमा गरिएको घोषणा कार्यक्रममा राष्टिय जनमोर्चाका जिल्ला अध्यक्ष कटकबहादुर शाहीले नानीकोटका महिलाहरुले थालेको छाउपडी मुक्त अभिान जिल्लाभरी चलाइनु पर्ने बताए ।
नेपाली कांग्रेसका पार्टी सभापती प्रजापती संज्याल, नेकपा एमालेका अध्यक्ष चन्दाकृष्ण संज्याल, नेकपा माओवादी केन्द्रका अध्यक्ष नर्ज बोहोरा लगायतका स्थानिय राजनीतिकदलका नेताहरुले छाउपडी प्रथाको अन्त्यका लागि नानीकोट गाविसभरी नै यस बिरुद्ध सामाजिक जागरणको अभियान संचालन गरी गाविसलाई नै छाउपडी प्रथा मुक्त गाविस बनाईने प्रतिबद्धता जनाएका छन् ।