आर्थिक, सामाजिक, सांस्कृतिक र राजनीति रुपान्तरणको मियो सहकारी – मन्त्री महरा

काठमाडौँ । उपप्रधान तथा अर्थमन्त्री कृष्णबहादुर महराले सरकारी, सहकारी र निजी क्षेत्रको संयुक्त प्रयत्नबाट मुलुकको विकास गतिशील हुने बताएका छन् ।

राष्ट्रिय सहकारी सङ्घले आयोजना गरेको राष्ट्रिय कार्यशाला गोष्ठीलाई आज यहाँ सम्बोधन गर्दै उनले नेपालको संविधान, २०७३ ले सार्वजनिक, निजी र सहकारी क्षेत्रको सहभागिता र स्वतन्त्र विकासमार्फत राष्ट्रिय अर्थतन्त्र सुदृढ गर्ने परिकल्पना गरेको छ भने ।

उपप्रधानमन्त्री महराले आर्थिक, सामाजिक, सांस्कृतिक र राजनीतिक रुपान्तरणको मियो बनेका सहकारी संस्थाले ‘सुतखारी’ र ‘ढिकुटी’ जस्ता सामन्ती प्रथाको जरो उखेल्नुका साथै विश्वमा कीर्तिमान समेत राखेका छन् भने ।

दुई दिनसम्म सञ्चालन हुने उक्त गोष्ठीमा उनले ठूलो पुँजीले भन्दा स–सानो पुँजीको एकीकरणबाट दिगो विकास गर्न सहकारी मेरुदण्ड सावित हुने धारण राखे ।

‘आर्थिक विकास र सामाजिक रुपान्तरणका लागि सहकारी’ भन्ने अभियानका साथ सुरु भएको उक्त कार्यशालालाई सम्बोधन गर्दै रक्षामन्त्री बालकृष्ण खाँणले नेपाली राजनीतिमा शुद्धीकरणको अभियन्ता सहकारीकर्मीहरु भएको धारण व्यक्त गरे ।

उनले सहकारी अगुवासँग व्यवस्थापकीय क्षमता, लगनशीलता र अर्थको राम्रो समायोजन गर्न सक्ने सीप र दक्षता भएकाले उनीहरुलाई स्थानीय निकायको जिम्मेवारी दिनु आजको आवश्यकता रहेको बताए ।

रक्षामन्त्री खाँणले शान्ति, समृद्धि र गाउँको विकासका लागि सहकारी संस्थाको अग्रणी भूमिका रहेको बताउँदै मुलुकको अर्थतन्त्र चलायमान बनाउन, महिलाको सशक्तीकरण गर्न र नेतृत्व क्षमता विकास गर्न सहकारीको महत्वपूर्ण भूमिका रहेको छ भने । कार्यक्रममा पूर्वमन्त्री गणेश शाहले सहकारी मुलुकको विकासका लागि आधारशीला भएको धारण राखे ।

सहकारी सङ्घका अध्यक्ष केशव बडालले सहकारीमा सुशासन कायम गरी संयुक्त राष्ट्रसङ्घको दिगो विकास लक्ष्य प्राप्तिका लागि नेपालका सहकारीको भूमिका कस्तो रहनुपर्छ भन्ने बोध गराउने उद्देश्यले कार्यशाला आयोजना गरिएको बताए ।

गोष्ठीमा मुलुकभरिका विभिन्न क्षेत्रका विषयगत सहकारी संस्थाका ३०० व्यक्तिको सहभागिता छ ।

उक्त गोष्ठीमा नेपाल राष्ट्र बैंकका पूर्व गभर्नर डा युवराज खतिवडा, सहकारी ज्ञाताहरु सुरेश प्रधान, डा राजु अधिकारी, रमेश बडाल, सभासद् ओमदेवी मल्ल दीपक बास्कोटालगायतले सहकारीसम्बन्धी विभिन्न कार्यपत्र प्रस्तुत गर्ने कार्यक्रम रहेको छ ।