६१ जना नेपाली कुवेतको जेलमा, अधिकांश लागुऔषधमा संलग्न

वेत । कुवेतको केन्द्रिय कारागारमा ६१ जना नेपालीले जेल जीवन बिताइरहेका छन् ।

नेपाली दुताबास कुवेतका अनुसार अधिकांश लागु औषध ओसारपसार तथा बेचबिखानमा संलग्न रहेका छन् भने बाँकी बलात्कार, चोरी डकैति, झैँ–झगडाको मुद्दामा जेल परेका हुन् ।

नेपाली दूतावास कुवेतको आयोजनामा नेपालमा लगानी भित्र्याउने सम्बन्धमा नेपाली दुताबास कुवेत र कुवेतमा रहेका नेपाली समुदायबीच आज बृहत अन्तर्क्रिया कार्यक्रममा सो तथ्य प्रस्तुत गरिएको हो ।
कार्यक्रममा केही व्यक्तिको स्वार्थका कारण नेपालीहरुले गैर कानूनी क्रियाकलापमा जानीजानी संलग्न हुने गरेको, धेरै पैसा कमाउने लोभले नेपालीहरु फस्ने गरेकोले कुवेतमा कार्यरत नेपालीहरुको प्रतिष्ठामा आँच आईरहेको र कुवेतमा नेपालीहरुले शिर ठाडो गरेर हिँड्ने अवस्था नभएको भन्दै यस तर्फ सबै सचेत हुनुपर्ने वक्ताहरुले धारणा राखेका थिए ।

दूतावासका मिनिस्ट्री अफ काउन्सुलर लेखनाथ भट्टराईले विदेशी लगानी मार्फत पूँजी तथा प्रविधिलाई भित्र्याउन नेपाल सरकारको उद्योग मन्त्रालय र लगानी बोर्डले संयुक्त रुपमा आगामी मार्च २ र ३ मा काठमाडौमा नेपाल लगानी सम्मेलनको आयोजना गर्न लागेको जानकारी दिए ।
अन्तरक्रिया कार्यक्रममा दुताबासले कुवेतमा कार्यरत नेपालीहरुको बसाईलाई सहज बनाउन सचेतना सम्बन्धि छलफल पनि गरेको थियो ।
कुवेतमा क्रियाशील बिभिन्न संघसंस्थाका प्रतिनिधिहरु, पत्रकार, वुद्दिजिवी र ब्यबसायीहरुले आ–आफ्नो सुझाब सहित विचार राखेका थिए ।

कार्यक्रममा प्रवासबाटै भएपनि देश निर्माणमा सहभागी हुन पाउनु राम्रो कुरा भएको तर लगानी सम्बन्धि कुनै स्पष्ट खाका सहितको धारणा नआएकोले लगानीको सुनिश्चितताको बिषयमा गम्भीर हुन र स्पष्ट खाका सहितको अवधारणा ल्याउन वक्ताहरुले दुताबासलाइ अनुरोध गरेका थिए ।

कुवेत सरकारको पछिल्लो तथ्यांक अनुसार करिब ६१ हजार नेपालीहरु
बैधानिक रुपमा वसोवास गरिरहेको छन् भने ५ हजारको हाराहारीमा गैरकानूनी रुपमा रहेका छन् । गत बर्ष २०१६ मा २० हजार नेपालीहरु कुवेतमा काम गर्न आउन भनि दूतावासले कागजात प्रमाणित गरेको दुताबासले जनाएको छ ।