प्रधानन्यायाधीशबिरुद्ध बारको आन्दोलन फिर्ता

प्रधानन्यायाधीश तथा न्यायपरिषद् अध्यक्ष सुशीला कार्कीको इजलास र अन्य कार्यक्रम समेत बहिस्कार गर्ने घोषणासहितको आन्दोलन नेपाल बार एसोशिएसनले फिर्ता लिएको छ । प्रधानन्यायाधीश कार्कीको उपस्थितिमा सर्वोच्च अदालतका तीन न्यायाधीश र पदाधिकारीको वार्ता ४ बुँदे सहमतिमा टुंगिएपछि उक्त आन्दोलन फिर्ता लिएको बारले जनाएको छ  ।

प्रधानन्यायाधीश कार्कीले वार्ता टोली गठन गरेपछि बारले आफ्ना आन्दोलन स्थगित गरेको थियो ।

आगामी दिनमा न्यायाधीश नियुक्ति समानुपातिक समावेसी बनाउन परिषद्को ध्यानाकर्षण गर्ने, बार बेन्च समन्वय समितिलाई क्रियाशील गराउने, संवैधानिक इजलास गठन गर्न परिषद्को ध्यानाकर्षण गर्ने र सर्वोच्च अदालतको उच्च स्तरीय न्यायिक समस्या समाधान समिति र बारले गठन गरेको अनुगमन गरेको अनुगमन समितिको नियमित बैठक गर्ने सहमति भएको हो ।

न्यायाधीश हरिकृष्ण कार्की, अनिल सिन्हा, सपना मल्ल सर्वोच्चको तर्फबाट, बार अध्यक्ष शेरबहादुर केसी, सर्वोच्च बारका अध्यक्ष शैलेन्द्र दाहाल, बरिष्ठ अधिवक्ता हरिहर दहाल र हरि उप्रेतीबीच वार्ता भएको थियो ।

 तीन साताअघि न्यायपरिषद्ले उच्च अदालतमा गरेको न्यायाधीश सिफारिसमा असन्तुष्टि जनाउन जाँदा प्रधानन्यायाधीशले समय नदिएपछि रुष्ट बारले सोमबारदेखि उनी विरुद्ध आन्दोलन घोषणा गरेको थियो ।

न्यायाधीश नियुक्तिमा असहमति बाहेक, सर्वोच्च अदालतमा पेशी व्यवस्थापन, पार्किङ व्यवस्थापन ,अदालतहरुले जारी गरेका निवेदनका ढाँचाहरु खारेजी लगायत १२ बुँदे  माग राखेर बारले प्रधानन्यायाधीशको इजलास बहिस्कार गर्ने निर्णय गरेको थियो ।