स्ववियू चुनाव नरोक्न बिप्लवलाई नविनाको आग्रह

काठमाडौं । अनेरास्ववियू अध्यक्ष नविना लामाले स्ववियू चुनाव प्रभावित नगर्न नेकपा माओवादीका महासचिव नेत्रविक्रम चन्द विप्लवसँग आग्रह गरेकी छिन् । शनिवार साँझ विप्लवलाई भेटेर लामाले यस्तो आग्रह गरेकी हुन् ।

‘मैले बिप्लव कमरेडलाई भेटेर मिति तय भएको र तयारी पुरा भएको स्ववियू चुनाव प्रभावित नगर्न आग्रह गरेँ । उहाँले आफु स्ववियू चुनावको पक्षमै रहेको तर आफ्नो पार्टीको महाधिवेशनको बन्दसत्र रोल्पामा हुने भएकाले चुनावी तयारीमा समस्या रहेको बताउनुभयो ।’ लामाले भनिन्, ‘त्यहीँ पनि उहाँले यस विषयमा पार्टीभित्र थप छलफल गर्ने बताउनुभएको छ ।’

भेटमा बिप्लवले राष्ट्रियताका विषयमा अनेरास्ववियूले खेलेको भूमिकालाई स्वागत गरेको लामाको भनाई छ । यही फागुन १४ गते स्ववियू चुनाव हुँदैछ । तर, पूर्ण समानुपातिक लगायतका माग राखेर विप्लव माअ‍ोवादीसहितका केही विदार्थी संगठनले क्याम्पसहरुमा तालाबन्दी गरेका छन् ।