“अर्काको दूताबासमा भात खानेले जनताको हितमा केहि गर्न सक्दैनन्” – एमाले

इटहरी । नेकपा एमालेले नेपाली कांग्रेस, नेकपा माओवादी केन्द्र र मधेसी मोर्चाले जनताको हितमा कुनै काम गर्न नसक्ने दाबी गरेको छ ।

सो पार्टीले चलाएको मेचीकाली राष्ट्रिय अभियान अन्तर्गत इटहरीको बिराट चोकमा आइतबार आयोजित आमसभामा बोल्दै उपाध्यक्ष भीम रावलले भने, ‘ अर्काको दूताबासको भात खानेहरुले नेपाली जनतालाई केहि गर्न सक्दैनन् । ’
उनले एमालेले आगामी स्थानीय चुनावमा देशैभरि विजय हासिल गर्ने दाबी गर्दै त्यही बुझेर कांग्रेस माओवादीले एमालेविरुद्ध भ्रम फैलाइरहेको बताए ।

वर्तमान संविधानले सबैको हक अधिकारको सुनिश्चितता परेको भन्दै उनले संविधान संशोधनको जरुरी नभएको तर्क गरे ।

उनले केहि पार्टी र व्यक्ति हिमाल, पहाड, मधेस छुट्याउन लागिपरेको गम्भीर आरोप लगाउँदै उनले तर एमालेले कुनै पनि हालतमा त्यस्तो हुन नदिने बताए ।

हिजो झापाबाट सुरु भएको एमाले अभियान आज इटहरी आएर विराटचोकमा सभा भइरहेको छ ।   अभियानमा अध्यक्ष केपी ओलीसहितका  सबै शीर्ष नेताहरुको सहभागिता रहेको छ ।