म्याग्दीको बालमन्दिर विद्यालयमा भिषण आगलागी, एक करोडको क्षति

म्याग्दी । म्याग्दीको बेनी नगरपालिका १४ डाँडाखेतमा रहेको बालमन्दिर आधारभूत विद्यालयमा बुधबार राती आगोलागी हुँदा दश कोठे भवन जलेर ध्वस्त भएको छ ।

आगोलागीबाट काठ, ढुङ्गामाटोले बनेको दुई तले दश कोठे भवन जलेर ध्वस्त भएको हो ।

विद्युत सर्ट भएर आगोलागी हुँदा भवनका साथै फर्नीचर लगायतका भौतीक सामग्री जलेर नष्ट हुँदा रु १ करोड भन्दा बढीको क्षति भएको शिक्षक रामप्रसाद शर्माले जानकारी दिए ।

विद्यालय प्रशासनका कागजात, कम्प्युटर, पुस्तकालयका करिव ७ हजार पाठ्यपुस्तक, ९ वटा कम्प्यूटर सहित विद्यालयका महत्वपुर्ण दस्तावेज सहितको साम्रग्री जलेर नष्ट भएको छ ।

साँझ सवा पाँच बजेदेखि सुरु भएको आगोलागी राती करिब ९ बजेपछि स्थानीय र प्रहरीले नियन्त्रणमा लिएका थिए ।

विद्युतीय पुस्तकालय समेत जडान गरिएको कक्षा ८ सम्मको पाठनपाठन हुने सो विद्यालयमा १७४ जना विद्यार्थी अध्ययनरत छन् ।