बन्दले सुदुरपश्चिम प्रभावित, बन्दका बेला पूर्व जान ‘वैकल्पिक मार्ग’

कञ्चनपुर/उदयपुर । बन्दको प्रभाव भारतीयको गोली लागि नेपाली मारिएको जिल्ला कञ्चनपुरलगायत सुदूरपश्चिमको जनजीवनमा पनि परेको छ ।

कैलाली कञ्चनपुरलगायत पहाडी जिल्लाका सदरमुकाममा बिहानैदेखि बन्दकर्ता सडकमा उत्रेका छन् ।

बन्दकर्ताले ठाउँठाउँमा टायर बालेर घटनाको विरोध गरेका छन् । कञ्चनपुरको महेन्द्रनगर र कैलालीको धनगढीबाट लामो तथा छोटो दूरीका सवारी साधन चल्न सकेको छैन ।

गाडी नचल्दा भारतका विभिन्न स्थानबाट रोजगारी गरी नेपाल फर्केका यात्रु मारमा परेका छन् । केहीले भने अवैध रुपमा चर्को भाडा लिएर यात्रु ओसारपोसार गरिरहेका छन् ।

केही दिनदेखि मधेश बन्दले पूर्व–पश्चिम राजमार्गमा यातायात संचालन नहुँदा उदयपुरको निर्माणाधीन बैकल्पिक सडक प्रयोग गर्नेको संख्या बढेको छ ।

कोशी व्यारेजदेखि वलानखोला सप्तरी खण्ड ठप्प हुँदा यो सडक प्रयोगमा आएको हो ।

पूर्वी भारतको सिक्किम तथा पश्चिम बंगालका तीर्थयात्री लगायतले सिन्धुलीको भिमान-उदयपुरको कटारी-नेपालटार–गाईघाट-बेल्टार-रामपुर-चतरा हुदैं यातायातको साधन संचालनमा आएको थियो ।

सप्तकोशीले धार परिवर्तन गरेसँगै चतरामा बनाइएको पुलले यातायातलाई सहज बनाएको हो ।