बाहिर काम गर्ने डाक्टरलाई कडा कारवाही : मन्त्री थापा

संजय मिश्रा रौतहट, चैत ११– स्वास्थ्य मन्त्री गगन थापाले कार्यालय समयमा अन्यत्र काम गर्ने डाक्टरलाई कडा कारवाही गर्ने चेतावनी दिएका छन् । स्वास्थ्य मन्त्रालय र नेपाली सेनाले रौतहटको सदमुकाम गौरमा आयोजना गरेको निशुल्क स्वास्थ्य शिविरको निरीक्षण पछि सञ्चारकर्मीसँग कुरा गर्दै मन्त्री थापाले यस्तो चेतावनी दिएका हुन् ।

रौतहटमा त्यस्तो समस्या देखिए तुरुन्त कारवाही गर्न मन्त्री थापाले कार्यक्रममा सहभागी सिडिओ उद्धव बहादुर थापालाई निर्देशन दिए ।
जिल्ला अस्पताल गौरमा तत्काल स्थाई दरबन्दी डाक्टरको ब्यवस्था गर्ने पनि मन्त्री थापाले आश्वासन दिएका छन् ।

शिविरमा बिरामीको भिड देखेका मन्त्री थापाले जिल्लामा राम्रो उपचारको अभाव रहेको ठहर गर्र्दै गौर अस्पतालमा बालरोग बिशेषज्ञका साथै ५० शैया सञ्चालनका लागी आवशयक उपकरण उपलब्ध गराउने प्रतिवद्धता जनाए ।

शिविरमा तिनदिन भित्र तीन हजार चारसय १४ बिरामीको स्वास्थ्य जाँच गरेको ईन्द्रबक्स गणका प्रमुख सेनानी राजु कार्कीले जानकारी दिए ।

सो अवधिमा ४४ जना बिरामीको मेजर अपरेसन तथा नौ जनाको माईनर अपरेसन गरेको प्रमुख सेनानी काकीले बताए ।